ന്യൂഡൽഹി: കള്ളപ്പണം വെളുപ്പിക്കൽ കേസിൽ കോൺഗ്രസ് അദ്ധ്യക്ഷ സോണിയ ഗാന്ധി ജൂലൈ 21ന് ചോദ്യം ചെയ്യലിന് ഹാജരാകണമെന്ന് എൻഫോഴ്സ്മെന്റ് ഡയറക്ടറേറ്റ്. ജൂലൈ 21ന് രാവിലെ 11ന് ഇഡി ആസ്ഥാനത്ത് ഹാജരാകാനാണ് സോണിയയോട് ആവശ്യപ്പെട്ടിരിക്കുന്നത്. കൊറോണ ബാധയെ തുടർന്ന് ചോദ്യം ചെയ്യലിനെത്താൻ നേരത്തേ സോണിയക്ക് സാധിച്ചിരുന്നില്ല.
നേരത്തേ, ജൂൺ 8ന് ഹാജരാകാനാണ് സോണിയയോട് ആവശ്യപ്പെട്ടിരുന്നത്. രോഗബാധിതയായതിനാൽ ഹാജരാകാൻ സാധിക്കില്ലെന്ന് സോണിയ അറിയിച്ചിരുന്നു. തുടർന്ന് ജൂൺ 21ന് ഹാജരാകാൻ സോണിയക്ക് വീണ്ടും നോട്ടീസ് അയച്ചു. എന്നാൽ, കൊറോണ അനുബന്ധ ബുദ്ധിമുട്ടുകളെ തുടർന്ന് സമയം നീട്ടി നൽകണമെന്ന സോണിയയുടെ ആവശ്യം ഇഡി അംഗീകരിക്കുകയായിരുന്നു.
കള്ളപ്പണം വെളുപ്പിക്കൽ നിരോധന നിയമ പ്രകാരം സോണിയയുടെ മൊഴി രേഖപ്പെടുത്താനാണ് ഇഡിയുടെ നീക്കം. കള്ളപ്പണം വെളുപ്പിക്കൽ കേസിൽ രാഹുൽ ഗാന്ധിയെ കഴിഞ്ഞ മാസം വിശദമായി ഇഡി ചോദ്യം ചെയ്തിരുന്നു.
നാഷണൽ ഹെറാൾഡ് കേസിൽ മുതിർന്ന കോൺഗ്രസ് നേതാവ് മല്ലികാർജ്ജുൻ ഖാർഗെയേയും കോൺഗ്രസ് ട്രഷറർ പവൻ ബൻസാലിനെയും ഇഡി നേരത്തേ ചോദ്യം ചെയ്തിരുന്നു. നാഷണൽ ഹെറാൾഡിന്റെ പ്രസാധകരായ അസോസ്സിയേറ്റഡ് ജേണൽസ് ലിമിറ്റഡ്, ഉടമസ്ഥരായ യംഗ് ഇന്ത്യ ലിമിറ്റഡ് എന്നിവയുടെ ഓഹരി ഇടപാടുകളും സാമ്പത്തിക ഇടപാടുകളും ഇഡി പരിശോധിച്ച് വരികയാണ്.
