സുൽത്താൻബത്തേരി: വയനാട് സുൽത്താൻ ബത്തേരിയിൽ ജനവാസ പ്രദേശത്ത് വീണ്ടും കടുവയുടെ ആക്രമണം. ജനവാസ മേഖലയിലിറങ്ങിയ കടുവ വളർത്തു നായയെ ആകമിച്ച് കൊന്നു. ബത്തേരി വാകേരിയിലെ ഏദൻവാലി എസ്റ്റേറ്റിൽ കഴിഞ്ഞ ദിവസം വൈകിട്ടായിരുന്നു സംഭവം. കടുവ ഇറങ്ങിയതിന്റെ സിസിടിവി ദൃശ്യങ്ങൾ അടക്കം പുറത്ത് വന്നിട്ടുണ്ട്. കടുവയുടെ സാന്നിധ്യം പ്രദേശത്ത് പതിവാണെന്നും, തങ്ങൾ ഭീതിയിലാണെന്നും നാട്ടുകാർ പരാതിപ്പെടുന്നു.
നൂറുകണക്കിന് തൊഴിലാളികൾ ദിവസവും നടന്നു പോകുന്ന വഴിയിലാണ് കടുവയെ കണ്ടെത്തിയത്. എസ്റ്റേറ്റിലെ തന്നെ തൊഴിലാളികളിൽ ഒരാളുടെ നായയെ ആണ് കടുവ ആക്രമിച്ചത്. നായയെ കടിച്ചെടുത്ത ശേഷം ചെടികൾക്കുള്ളിലേക്ക് കടുവ മറയുന്നത് ദൃശ്യങ്ങളിൽ കാണാം. നായയുടെ ജഡം തൊഴിലാളികൾ കണ്ടെടുത്തു. പ്രദേശത്ത് കടുവയെ കാണാറുണ്ടെന്ന് നാട്ടുകാർ നേരത്തെ വനംവകുപ്പിനോട് പരാതിപ്പെട്ടിട്ടുണ്ട്.
