അതിമനോഹരമായി എഡിറ്റ് ചെയ്ത ഫോട്ടോഷോപ്പ് ചിത്രങ്ങളെ കവച്ചുവെക്കുന്ന പ്രകൃതി ദൃശ്യമാണ് ഇപ്പോൾ സോഷ്യൽമീഡിയയിൽ തരംഗമാകുന്നത്. കാഴ്ചക്കാരെ അത്ഭുതപ്പെടുത്തുന്ന ദൃശ്യങ്ങൾ അന്റാർട്ടിക്കയിൽ നിന്നുള്ളതാണ്. പതിവിന് വിപരീതമായി വ്യത്യസ്ത നിറങ്ങളാൽ വർണാഭമായ ആകാശമാണ് അന്റാർട്ടിക്കയിൽ നിന്നും പകർത്തിയ ദൃശ്യങ്ങളിൽ കാണാൻ സാധിക്കുക. ഓറഞ്ച്, പർപ്പിൾ, പിങ്ക് നിറങ്ങളാൽ സമന്വയിച്ച ആകാശത്തിന്റെ ചിത്രങ്ങൾ ഏതൊരാൾക്കും അവിശ്വസനീയമായി തോന്നാം..
അന്റാർട്ടിക്കയിലുള്ള ന്യൂസിലാൻഡ് സ്വദേശിയായ സയൻസ് ടെക്നീഷ്യൻ സ്റ്റുവർട്ട് ഷാ എടുത്ത ഫോട്ടോകളാണിത്. നിലവിലെ സീസണിൽ മിക്കപ്പോഴും ഇരുണ്ട ആകാശമാണ് അന്റാർട്ടിക്കയിൽ കാണപ്പെടാറുള്ളത്. ഉച്ചമസയത്തുണ്ടാകുന്ന ചെറിയൊരു സൂര്യവെളിച്ചമൊഴികെ ശേഷിക്കുന്ന സമയമെല്ലാം തുടർച്ചയായി ഇരുണ്ടിരിക്കുന്നതാണ് അന്റാർട്ടിക്കയിലെ അന്തിരീക്ഷം. അപ്പോഴാണ് അന്റാർട്ടിക്കയിലെ സ്കോട്ട് ബേസിൽ താമസിക്കുന്ന സ്റ്റുവർട്ട് ഷാ അപൂർവ്വമായ ഈ ആകാശ കാഴ്ച കണ്ടത്.
ഈ വർഷമാദ്യം ടോംഗയിൽ ഉണ്ടായ അഗ്നിപർവ്വത സ്ഫോടനത്തിന്റെ പരിണിതഫലമായാണ് ആകാശത്ത് ഈ നിറങ്ങൾ രൂപപ്പെട്ടതെന്ന് പറയപ്പെടുന്നു. അഗ്നിപർവ്വതത്തിൽ നിന്ന് ഉയർന്ന് പൊങ്ങിയ ചില രാസകിരണങ്ങൾ സ്ട്രാറ്റോസ്ഫിയറിൽ എത്തിയപ്പോഴായിരിക്കാം വർണാഭമായ തിളക്കം രൂപപ്പെട്ടതെന്നും വിദഗ്ധർ അഭിപ്രായപ്പെട്ടു.
