തിരുവനന്തപുരം: സിപിഎം നേതാവും എംഎൽഎയുമായ എം.എം.മണിയെ അധിക്ഷേപിച്ച് മഹിളാ കോൺഗ്രസ്. മണിയുടെ തുടർച്ചയായ സ്ത്രീ വിരുദ്ധ പ്രസ്താവനകളിൽ പ്രതിഷേധിച്ച് മഹിളാ കോൺഗ്രസ് നടത്തിയ മാർച്ചിനിടെയാണ് സംഭവം. മണിയുടെ മുഖത്തിന്റെ ചിത്രം ചിമ്പാൻസിയുടെ ചിത്രത്തിൽ ചേർത്തു വച്ചായിരുന്നു മാർച്ച്. കെ.കെ.രമയെ അധിക്ഷേപിച്ചതിന് മാപ്പ് പറയണം എന്നാവശ്യപ്പെട്ടായിരുന്നു പ്രതിഷേധം. സംഭവം വിവാദമായതോടെ മഹിളാ കോൺഗ്രസ് പ്രവർത്തകർ ചിത്രം ഒളിപ്പിച്ചു.
ചിമ്പാൻസിയുടെ പടം ഒഴിവാക്കി കോലം ഉപയോഗിച്ചായിരുന്നു പിന്നീടുള്ള പ്രതിഷേധം. പ്രതിഷേധത്തിനൊടുവിൽ മണിയുടെ കോലം കത്തിച്ചു. ചിമ്പാൻസിയുടെ ചിത്രം പ്രതിഷേധത്തിൽ ഉപയോഗിച്ചതിനേയും മഹിളാ കോൺഗ്രസ് പ്രവർത്തകർ ന്യായീകരിച്ചു. ഇത് വെറൈറ്റി സമരമാണെന്നാണ് നേതാക്കൾ പറഞ്ഞത്.
അതേസമയം എം.എം.മണി മാപ്പ് പറയണം എന്നാവശ്യപ്പെട്ട് പ്രതിപക്ഷവും നിയമസഭയിൽ പ്ലക്കാർഡുകൾ ഉയർത്തി പ്രതിഷേധിച്ചു. മണിയുടെ പരാമർശം സഭാ രേഖകളിൽ നിന്ന് നീക്കണമെന്നാണ് പ്രതിപക്ഷ നേതാവ് ആവശ്യപ്പെട്ടത്. ഈ ആവശ്യം പരിഗണിക്കാമെന്ന് ഡെപ്യൂട്ടി സ്പീക്കർ മറുപടി നൽകി.
