കയ്പ്പയ്‌ക്ക അല്ലെങ്കിൽ പാവയ്‌ക്ക എന്ന് കേട്ടാൽ പലരുടെയും മുഖം ചുളിയും. കയ്പ്പയ്‌ക്കയുടെ രുചി തന്നെയാണ് അതിന് കാരണം. എങ്കിലും പലവിധത്തിലുള്ള വിഭവങ്ങളായി കയ്പ്പയ്‌ക്ക നമ്മുടെ തീൻമേശയിലെത്താറുണ്ട്. കറിയായും മെഴുക്കുപുരട്ടിയായും വറുത്ത് കോരിയുമെല്ലാം വിളമ്പുന്ന കയ്പ്പയ്‌ക്കയാണെങ്കിൽ നാം അകത്താക്കും. ചിലർ കയ്പിനെ വകവെക്കാതെ ജ്യൂസാക്കി കുടിക്കുകയും ചെയ്യാറുണ്ട്. കയ്പ്പയ്‌ക്കയുടെ ആരോഗ്യ ഗുണങ്ങൾ നിരവധിയായതിനാലാണ് കയ്പിനെ അവഗണിച്ച് ജ്യൂസ് കുടിക്കുന്നത്..
ഇരുമ്പ്, മഗ്‌നീഷ്യം, പൊട്ടാസ്യം, വിറ്റാമിൻ സി തുടങ്ങി നിരവധി പോഷകങ്ങളുടെ ഒരു കലവറ തന്നെയാണ് കയ്പ്പയ്‌ക്ക. ഫൈബർ നല്ലപോലെ അടങ്ങിയിട്ടുള്ള ഒരു പദാർത്ഥം കൂടിയാണിത്. ചീരയിലുള്ളതിനേക്കാൾ ഇരട്ടി കാൽസ്യം, ബ്രൊക്കോളിയിലേത് പോലെ ബീറ്റാ കരോട്ടിൻ, നേന്ത്രപ്പഴത്തിലെ പൊട്ടാസ്യം എന്നിവ കയ്പ്പയ്‌ക്കയിൽ അടങ്ങിയിട്ടുണ്ട്.
കയ്പ്പയ്‌ക്ക ജ്യൂസായി കുടിച്ചാൽ ഗുണങ്ങൾ അനവധിയാണ്. ജ്യൂസ് കയ്പ്പറിയാതെ എളുപ്പത്തിൽ കുടിക്കാനുള്ള ചില പോംവഴികൾ ഇതാ..
കുറച്ച് തേനോ ശർക്കരയോ ചേർത്ത് ജ്യൂസ് തയ്യാറാക്കിയാൽ കയ്പ്പില്ലാത്ത, ഗുണങ്ങൾ നഷ്ടപ്പെടാത്ത പാവയ്ക്കാ നീര് കുടിക്കാവുന്നതാണ്. ആപ്പിളോ പേരയ്‌ക്കയോ ചേർത്ത് ജ്യൂസ് അടിക്കുകയും ചെയ്യാം. നാരങ്ങ നീര് അൽപം ചേർക്കാവുന്നതാണ്. ഒരു നുള്ള് കുരുമുളക്, ഇഞ്ചി എന്നിവ ചേർത്താലും കയ്പ്പ് കുറഞ്ഞ് കിട്ടും.
100 ഗ്രാം കയ്പ്പയ്‌ക്കയിൽ 13 മില്ലിഗ്രാം സോഡിയം, 602 ഗ്രാം പൊട്ടാസ്യം, 7 ഗ്രാം കാർബോഹൈഡ്രേറ്റ്, 3.6 ഗ്രാം പ്രോട്ടീൻ എന്നിവയുണ്ട്. കയ്പ്പയ്‌ക്ക നിത്യ ജീവിതത്തിന്റെ ഭാഗമാക്കിയാൽ അനവധി ആരോഗ്യ ഗുണങ്ങൾ ലഭിക്കുമെന്നാണ് വിദഗ്ധർ അഭിപ്രായപ്പെടുന്നത്. പ്രമേഹത്തെ നിയന്ത്രിക്കാനും ചീത്ത കൊഴുപ്പിനെ ഇല്ലാതാക്കാനും കയ്പ്പയ്‌ക്ക സഹായിക്കും. മദ്യപിച്ച് ലക്കുകെട്ട് പിറ്റേ ദിവസം എഴുന്നേൽക്കുന്നവർ രാവിലെ കയ്പ്പയ്‌ക്ക ജ്യൂസ് കുടിക്കുന്നത് നല്ലതാണ്. കരളിനെ ശുദ്ധീകരിക്കാൻ ഇതുവഴി സാധ്യമാകും. ശരീര ഭാരം കുറയ്‌ക്കാനും പ്രതിരോധ ശേഷി വർധിപ്പിക്കാനും കയ്പ്പയ്‌ക്ക ജ്യൂസ് സഹായിക്കുമെന്ന് പഠനങ്ങൾ തെളിയിച്ചിട്ടുണ്ട്. കാഴ്ച ശക്തി വർധിപ്പിക്കാനും കണ്ണുകളുടെ ആരോഗ്യത്തിനും കയ്പ്പയ്‌ക്ക നല്ലതാണെന്നാണ് വിദഗ്ധരുടെ നിരീക്ഷണം.
