ശ്രീനഗർ: ജമ്മു കശ്മീരിൽ വീണ്ടും ക്ഷേത്രത്തിന് നേരെ ആക്രമണം. സുഭാഷ് നഗറിലെ ദശമുഖി മഹാകാളി ക്ഷേത്രത്തിന് നേരെയാണ് ആക്രമണം ഉണ്ടായത്. സംഭവത്തിൽ ഒരാളെ പോലീസ് അറസ്റ്റ് ചെയ്തിട്ടുണ്ട്.
ഇന്നലെ വൈകീട്ടോടെയായിരുന്നു സംഭവം. ശബ്ദം കേട്ട് പ്രദേശവാസികൾ പുറത്തിറങ്ങി നോക്കിയപ്പോഴാണ് ക്ഷേത്രത്തിന് നേരെ ആക്രമണം നടത്തുന്നത് കണ്ടത്. ഉടനെ വിവരം ക്ഷേത്രം അധികൃതരെയും പോലീസിനെയും അറിയിക്കുകയായിരുന്നു. ഇയാളുടെ ആക്രമണത്തിൽ ക്ഷേത്രത്തിലെ മഹാലക്ഷ്മി വിഗ്രഹം പൂർണമായും തകർന്നു. ക്ഷേത്രത്തിലെ മറ്റ് വിഗ്രഹങ്ങളും ഇയാൾ അടിച്ച് തകർത്തിട്ടുണ്ട്.
ക്ഷേത്രം ആക്രമിക്കുമ്പോൾ അക്രമി മദ്യലഹരിയിൽ ആയിരുന്നു എന്നാണ് വിവരം. സംഭവത്തിൽ ഇന്ത്യൻ ശിക്ഷാ നിയമത്തിലെ 295, 452 എന്നീ വകുപ്പുകൾ പ്രകാരമാണ് കേസ് എടുത്തിരിക്കുന്നത്. വൈദ്യപരിശോധനയ്ക്ക് ശേഷം ഇയാളെ ഇന്ന് കോടതിയിൽ ഹാജരാക്കും.
കഴിഞ്ഞ നാല് മാസത്തിനിടെ ജമ്മു കശ്മീരിൽ ആറാമത്തെ ക്ഷേത്രമാണ് ആക്രമിക്കപ്പെടുന്നത്. ക്ഷേത്രത്തിന് നേരെയുള്ള ആക്രമണങ്ങൾ വർദ്ധിച്ചുവരുന്ന സാഹചര്യത്തിൽ ശക്തമായ നടപടി സ്വീകരിക്കണമെന്ന് ഹിന്ദു സംഘടനകൾ ആവശ്യപ്പെട്ടു.
