ശ്രീനഗർ: ശ്രീനഗറിൽ ഭീകരവാദപ്രവർത്തനങ്ങൾക്കായി ഉപയോഗിച്ചിരുന്ന അഞ്ച് വീടുകൾ പൂട്ടിച്ചു.നിയമവിരുദ്ധ പ്രവർത്തന നിരോധന നിയമത്തിലെ സെക്ഷൻ 25, 2(ജി) പ്രകാരം ജമ്മു കശ്മീർ പോലീസാണ് വീടുകൾ പൂട്ടിയത്. ശ്രീനഗറിലെ ലവായ്പോരയിൽ രണ്ടും മലോരയിലും ബത്മാലുവിലും ഹർവാനിലും ഓരോ വീടുകൾ വീതവുമാണ് പോലീസ് സീൽ ചെയ്തത്. ശ്രീനഗർ ജില്ലയിലെ തീവ്രവാദ പ്രവർത്തനങ്ങളുടെ ഗൂഢാലോചനയ്ക്കും, ആസൂത്രണത്തിനുമാണ് തീവ്രവാദികൾ ഈ വീടുകൾ ഉപയോഗിച്ചിരുന്നതെന്ന് പോലീസ് വ്യക്തമാക്കി.
തീവ്രവാദ പദ്ധതികൾ ആസൂത്രണം ചെയ്യാനായി ഉപയോഗിച്ചിരുന്ന പത്തിലധികം വീടുകളാണ് ഈ വർഷം ജൂൺ മുതൽ പോലീസ് സീൽ ചെയ്തത്. ഭീകരർക്ക് അഭയം നൽകിയതിന് അഞ്ച് വീടുകൾ ജൂണിൽ ജപ്തി ചെയ്തു. ഈ വീടുകൾ തീവ്രവാദപ്രവർത്തനങ്ങൾക്കും അവരെ പാർപ്പിക്കാനും വേണ്ടി ഉപയോഗിച്ചതായിരുന്നു.വീട്ടിലെ അംഗങ്ങൾ അറിഞ്ഞുകൊണ്ട് നൽകിയതാണെന്നും അന്വേഷണത്തിൽ വ്യക്തമായി. ജനങ്ങൾക്ക് നേരെ ആക്രമണങ്ങൾ നടത്താനും തീവ്രവാദികൾ ഗൂഢാലോചന നടത്താനുമാണ് ഈ വീടുകൾ ഉപയോഗിച്ചിരുന്നതെന്ന് അന്വേഷണത്തിൽ തെളിഞ്ഞിരുന്നു.
Comments