ന്യൂഡൽഹി: രാജ്യം സ്വാതന്ത്ര്യത്തിന്റെ 75 സുവർണ്ണ വർഷങ്ങൾ ആഘോഷിക്കുന്ന വേളയിൽ പങ്കുചേർന്ന് ഗൂഗിളും. 75 വർഷത്തിൽ സംഭവിച്ച സുപ്രധാന സംഭവങ്ങളുടെ ചിത്രങ്ങൾ ഉൾക്കൊള്ളിച്ചു കൊണ്ടുള്ള ഓൺലൈൻ പ്രോജക്ടായ ‘ഇന്ത്യ കി ഉഡാൻ’ പദ്ധതി അവതരിപ്പിച്ചാണ് ഗൂഗിൾ വ്യത്യസ്തമാകുന്നത്. ഗൂഗിളിന്റെ കലാ സാംസ്കാരിക വിഭാഗമാണ് ഇന്ത്യ കി ഉഡാൻ പദ്ധതിയ്ക്ക് പിറകിൽ. കേന്ദ്ര സാംസ്കാരിക ടൂറിസം മന്ത്രി കിഷൻ റെഡ്ഡി, സാംസ്കാരിക മന്ത്രാലയത്തിലെയും ഗൂഗിൾ കമ്പനിയുടെയും മുതിർന്ന ഉദ്യോഗസ്ഥർ തുടങ്ങിയവർ ചേർന്നാണ് പ്രോജക്ടിന്റെ ഔദ്യോഗിക ഉദ്ഘാടനം നിർവഹിച്ചത്.
ഇന്ത്യയുടെ ആധുനിക ചരിത്രത്തിലെ സുപ്രധാന നിമിഷങ്ങൾ, വ്യക്തികൾ, ശാസ്ത്ര മേഖലയിലെയും കായിക മേഖലയിലെയും സുപ്രധാന നേട്ടങ്ങൾ, ഇന്ത്യൻ സ്ത്രീകൾ എങ്ങനെയാണ് ലോകത്തിന് പ്രചോദനവും മാതൃകയുമാക്കുന്നത് തുടങ്ങിയ വിവിധ വിഷയങ്ങൾ ഇന്ത്യ കി ഉഡാൻ കൈകാര്യം ചെയ്യുമെന്ന് ഗൂഗിൾ അറിയിച്ചു. ഇന്ത്യ കി ഉഡാൻ ഓൺലൈൻ ശേഖരണത്തിൽ കഴിഞ്ഞ 75 വർഷത്തിൽ സംഭവിച്ച അവിസ്മരണീയ നിമിഷങ്ങൾ ഹിന്ദിയിലും ഇംഗ്ലീഷിലുമാകും പ്രസിദ്ധീകരിക്കുക. 10 കലാകാരന്മാർ നിർമ്മിച്ച 120-ൽ പരം ചിത്രീകരണങ്ങളും 21 കഥകളുമാകും പ്രസിദ്ധീകരിക്കുക. ടൂറിസം മന്ത്രാലയം, മ്യൂസിയം ഓഫ് ആർട്ട് ആന്റ് ഫോട്ടോഗ്രാഫി, ഇന്ത്യൻ റെയിൽവേയുടെ ഹെറിറ്റേജ് ഡയറക്ടറേറ്റ് എന്നിവയുൾപ്പെടെ വിവിധ സ്ഥാപനങ്ങളിൽ നിന്നുള്ള പ്രദർശനങ്ങളും പദ്ധതി പ്രകാരം ഓൺലൈനായി ലഭ്യമാകും.
1947 മുതലുള്ള ഇന്ത്യയുടെ പരിണാമവും ഇന്ത്യയ്ക്കായി വിവിധ ആളുകൾ നൽകിയ സംഭാവനകളും ഉൾക്കൊള്ളിക്കുന്ന വിജ്ഞാനപ്രദമായ ഓൺലൈൻ പദ്ധതിയായി വിപുലീകരിക്കുമെന്ന് ഗൂഗിൾ വ്യക്തമാക്കി. വരുന്ന ഒരു വർഷക്കാലം ഗൂഗിളിന്റെ ഉൽപ്പന്നങ്ങളിലും സേവനങ്ങളിലും ജനങ്ങൾക്ക് പ്രത്യേക പാക്കേജുകളും മറ്റും ലഭ്യമാക്കുമെന്നും കമ്പനി അറിയിച്ചു.
‘അടുത്ത 25 വർഷത്തിനുള്ളിൽ എന്റെ ഇന്ത്യ’ എന്ന വിഷയത്തെ അടിസ്ഥാനമാക്കി ഡൂഡിൽ ഫോർഗൂഗിൾ മത്സരം ഒന്നു മുതൽ പത്തു വരെ ക്ലാസ്സുകളിലെ കുട്ടികൾക്കായി നടത്തുന്നുണ്ടെന്നും കമ്പനി അറിയിച്ചു. മികച്ച ഡൂഡിലായി തിരഞ്ഞെടുക്കുന്ന ഡൂഡിൽ ശിശുദിനമായ നവംബർ 14 ന് ഗൂഗിളിന്റെ ഹോം പേജിൽ ദൃശ്യമാകുമെന്നും വിജയിയ്ക്ക് 5 ലക്ഷം രൂപയുടെ സ്കോളർഷിപ്പും 2 ലക്ഷം രൂപയുടെ ടെക് നോളജി പാക്കേജും ലഭ്യമാക്കുമെന്നും ഗൂഗിൾ അറിയിച്ചു. വിജയിക്കുന്ന നാലു ഗ്രൂപ്പുകൾക്കും 15 അന്തിമഘട്ട വിജയികൾക്കും ആകർഷകമായ സമ്മാനങ്ങളും പ്രഖ്യാപിച്ചിട്ടുണ്ട്.ഹർഘർ തിരംഗയുടെ ഭാഗമായി പ്രത്യേക ഡൂഡിൽ തയ്യാറാക്കാൻ ഗൂഗിൾ ടീമിനോട് മന്ത്രി റെഡ്ഡി അഭ്യർത്ഥിച്ചു. ക്യാമ്പെയ്ൻ പ്രോത്സാഹിപ്പിക്കുന്നതിന്റെ ഭാഗമായാണ് മന്ത്രി നിർദേശം നൽകിയത്.
Comments