പ്രമുഖ ടിക് ടോക്ക് താരം ബലാത്സംഗക്കേസിൽ അറസ്റ്റിൽ; പരാതി നൽകിയത് കോളേജ് വിദ്യാർത്ഥിനി

തിരുവനന്തപുരം: കോളേജ് വിദ്യാർത്ഥിനിയെ പീഡിപ്പിച്ച കേസിൽ ടിക് ടോക്ക് താരം അറസ്റ്റിൽ. ചിറയിൻകീഴ് സ്വദേശി വിനീതാണ് അറസ്റ്റിലായത്.

കാർ വാങ്ങിക്കാൻ പോകാമെന്ന് പറഞ്ഞ് പെൺകുട്ടിയെ വിളിച്ചുവരുത്തി ഇയാൾ പീഡിപ്പിക്കുകയായിരുന്നു. ഇതിന് ശേഷം തിരുവനന്തപുരത്ത് ഒരു ഹോട്ടൽ മുറിയിലെത്തിച്ച് ബലാത്സംഗം ചെയ്തു. പെൺകുട്ടി ഇക്കാര്യം പോലീസിൽ പരാതി നൽകിയതിന്റെ അടിസ്ഥാനത്തിലാണ് അറസ്റ്റ് നടന്നത്.

ടിക്ക്‌ടോക്കിലും റീൽസിലും ഉൾപ്പെടെ വലിയ താരമായിരുന്നു വിനീത്. സമൂഹമാദ്ധ്യമങ്ങളിൽ നാല് ലക്ഷത്തോളം ഫോളോവേഴ്‌സ് വിനീതിനുണ്ടായിരുന്നു. വിനീതിന്റെ ഫോൺ പരിശോധിച്ച പോലീസ് ഞെട്ടിക്കുന്ന വിവരങ്ങളാണ് കണ്ടെത്തിയത്. നിരവധി സ്ത്രീകൾ വിനീതിന്റെ വലയിൽ കുരുങ്ങിയതായി തമ്പാനൂർ പോലീസ് കണ്ടെത്തി.

പെൺകുട്ടികളുടെ സ്വകാര്യ ദൃശ്യങ്ങൾ ഇയാളുടെ ഫോണിൽ റെക്കോർഡ് ചെയ്ത് സൂക്ഷിച്ചിരുന്നു. ഈ ദൃശ്യങ്ങൾ ഉപയോഗപ്പെടുത്തി പെൺകുട്ടികളോട് വിലപേശൽ നടത്തിയിട്ടുണ്ടോയെന്ന കാര്യവും അന്വേഷിച്ച് വരികയാണ്. മോഷണത്തിനും അടിപിടി കേസിലും ഇയാൾക്കെതിരെ നേരത്തെ കേസ് രജിസ്റ്റർ ചെയ്യപ്പെട്ടിട്ടുള്ളതായി പോലീസ് അറിയിച്ചു.