ഫ്ലോറിഡ: വെസ്റ്റ് ഇൻഡീസിനെതിരായാ നാലാം ട്വന്റി മത്സരത്തിൽ 59 റൺസിന്റെ വിജയവുമായി പരമ്പര സ്വന്തമാക്കി ഇന്ത്യ. ടോസ് നഷ്ടമായി ബാറ്റിംഗിനിറങ്ങിയ ഇന്ത്യ 20 ഓവറിൽ 5 വിക്കറ്റ് നഷ്ടത്തിൽ 191 റൺസെടുത്തു. മറുപടി ബാറ്റിംഗിൽ അവസാന ഓവറിലെ ആദ്യ പന്തിൽ വെസ്റ്റ് ഇൻഡീസ് 132 റൺസിന് പുറത്തായി.
ഇന്ത്യക്ക് വേണ്ടി മുൻ നിര ബാറ്റ്സ്മാന്മാർ മികച്ച പ്രകടനം കാഴ്ചവെച്ചു. 31 പന്തിൽ 44 റൺസെടുത്ത ഋഷഭ് പന്താണ് ഇന്ത്യയുടെ ടോപ് സ്കോറർ. 16 പന്തിൽ 33 റൺസെടുത്ത ക്യാപ്ടൻ രോഹിത് ശർമ്മയും 23 പന്തിൽ 30 റൺസുമായി പുറത്താകാതെ നിന്ന മലയാളി താരം സഞ്ജു സാംസണും നന്നായി കളിച്ചു. സൂര്യകുമാർ യാദവ് 24 റൺസും ദീപക് ഹൂഡ 21 റൺസും നേടിയപ്പോൾ അക്സർ പട്ടേൽ 20 റൺസുമായി പുറത്താകാതെ നിന്നു. വെസ്റ്റ് ഇൻഡീസിന് വേണ്ടി അൽസാരി ജോസഫ്, മക്കോയ് എന്നിവർ 2 വിക്കറ്റ് വീതം വീഴ്ത്തി. നന്നായി തല്ല് വാങ്ങിയ മക്കോയ് 4 ഓവറിൽ 66 റൺസ് വഴങ്ങി.
24 റൺസ് വീതമെടുത്ത ക്യാപ്ടൻ നിക്കോളാസ് പുരാനും റോവ്മാൻ പവലും മാത്രമാണ് കരീബിയൻ നിരയിൽ പിടിച്ചു നിൽക്കാനായത്. 8 പന്തിൽ 24 റൺസ് നേടിയ ക്യാപ്ടൻ നിക്കോളാസ് പുരാൻ ദൗർഭാഗ്യകരമായ റണ്ണൗട്ടിലൂടെ പുറത്തായത് അവർക്ക് തിരിച്ചടിയായി.
ഇന്ത്യൻ ബൗളർമാർ മികച്ച രീതിയിൽ പന്തെറിഞ്ഞു. അർഷ്ദീപ് സിംഗ് 3 വിക്കറ്റ് വീഴ്ത്തിയപ്പോൾ ആവേശ് ഖാൻ, അക്സർ പട്ടേൽ, രവി ബിഷ്ണോയ് എന്നിവർ രണ്ട് വിക്കറ്റ് വീതം വീഴ്ത്തി.
ഈ വിജയത്തോടെ ഏകദിന പരമ്പരയ്ക്ക് പിന്നാലെ ട്വന്റി പരമ്പരയും ഇന്ത്യ സ്വന്തമാക്കി. 5 മത്സരങ്ങളുടെ പരമ്പര 3-1നാണ് ഇന്ത്യ സ്വന്തമാക്കിയത്. ഇന്ത്യയുടെ ഇന്നത്തെ വിജയത്തോടെ അപ്രസക്തമായ പരമ്പരയിലെ അവസാന മത്സരം ഫ്ലോറിഡയിൽ നടക്കും.
