ന്യൂഡൽഹി: രാജ്യത്ത് നടന്ന ക്വിറ്റ് ഇന്ത്യ പ്രക്ഷോഭത്തിൽ പങ്കെടുത്ത ധീര ദേശഭിമാനികൾക്ക് പ്രണാമം അർപ്പിച്ച് പ്രധാനമന്ത്രി നരേന്ദ്ര മോദി. മഹാത്മാ ഗാന്ധിയുടെ നേതൃത്വത്തിൽ ബ്രിട്ടീഷ് ഭരണകൂടത്തിന്റെ കരിനിയമങ്ങൾക്കെതിരെ പോരാടാൻ തയ്യാറായ ധീരന്മാരെ രാജ്യം എന്നും സ്മരിക്കും. മഹാത്മജിയുടെ പ്രവർത്തനത്തിലും , വ്യക്തിത്വത്തിലും ആകൃഷ്ടരായ ചെറുപ്പക്കാർ ക്വിറ്റ് ഇന്ത്യാ സമരത്തിനും ഇന്ത്യൻ സ്വാതന്ത്ര്യ സമരത്തിനും ശക്തി പകരുകയുമാണ് ചെയ്തതെന്ന് പ്രധാനമന്ത്രി പറഞ്ഞു.
ഓഗസ്റ്റ് 9 നമ്മുടെ ദേശീയ വിപ്ലവത്തിന്റെ ജ്വലിക്കുന്ന പ്രതീകമായി മാറിയിരിക്കുന്നു എന്ന ജയപ്രകാശ് നാരായണന്റെ പരാമർശത്തെ പ്രത്യേകം അദ്ദേഹം ചൂണ്ടിക്കാട്ടി.
മഹാത്മജിയിൽ നിന്നും പ്രചോദനം ഉൾക്കൊണ്ട്, ക്വിറ്റ് ഇന്ത്യാ പ്രക്ഷോഭത്തിലേക്ക് ഇറങ്ങി തിരിച്ച ജയപ്രകാശ് നാരായൺ , ഡോ. രാം മനോഹർ ലോഹ്യ തുടങ്ങി നിരവധി മഹാരഥന്മാർ ഉൾപ്പെടെയുള്ളവർ സ്വാതന്ത്ര്യ സമര ചരിത്രത്തിലെ വീര ഗാഥകൾ സൃഷ്ടിച്ചവരായിരുന്നു. ഇവർ സമൂഹത്തിലുണ്ടാക്കിയ സ്വാധീനത്തിന്റെ മൂല കാരണം മഹാത്മജിയിൽ നിന്നും ഉൾകൊണ്ട ആദർശം കൊണ്ടാണെന്ന് പ്രധാനമന്ത്രി വ്യക്തമാക്കി
ക്വിറ്റ് ഇന്ത്യ സമര ചരിത്രത്തിന്റെ ത്യാഗ നിർഭരമായ ചരിത്ര ഏടുകളെയും മഹാരഥന്മാരെയും അനുസ്മരിച്ച ചടങ്ങിൽ പ്രക്ഷോഭത്തിന് തുടക്കമിട്ട മഹാത്മാ ഗാന്ധിയുടെ ചിത്രവും, സന്ദേശവും അദ്ദേഹം സമൂഹ മാദ്ധ്യമങ്ങളിലൂടെ പങ്കുവെച്ചു.
Comments