കൊൽക്കത്ത: പശ്ചിമ ബംഗാളിലെ മുഴുവൻ പഞ്ചായത്തുകളും പിടിച്ചടക്കാൻ ബിജെപി. പഞ്ചായത്ത് തിരഞ്ഞെടുപ്പിന് മുന്നോടിയായി പാർട്ടിയുടെ പ്രവർത്തനങ്ങൾ ഏകോപിപ്പിക്കുന്നത് സംബന്ധിച്ച കാര്യങ്ങൾ ചർച്ച ചെയ്യാൻ യോഗം ചേരും. പശ്ചിമ ബംഗാളിൽ അടുത്ത വർഷമാണ് പഞ്ചായത്ത് തിരഞ്ഞെടുപ്പ്.
വ്യാഴാഴ്ചയാണ് ഉന്നത നേതാക്കൾ പങ്കെടുക്കുന്ന യോഗം. പ്രതിപക്ഷ നേതാവ് സുവേന്ദു അധികാരി, ബംഗാൾ ബിജെപി അദ്ധ്യക്ഷൻ സുകന്ദ മജൂംദാർ, ഉപാദ്ധ്യക്ഷൻ ദിലീപ് ഘോഷ് എന്നിവർ യോഗത്തിൽ പങ്കെടുക്കും. ബിജെപി വക്താവ് അമിത് മാളവ്യയും യോഗത്തിൽ പങ്കെടുക്കുമെന്നാണ് സൂചന.
2024 ലെ ലോക്സഭാ തിരഞ്ഞെടുപ്പിന്റെ റിഹേഴ്സൽ ആയാണ് പഞ്ചായത്ത് തിരഞ്ഞെടുപ്പിനെ ബിജെപി കാണുന്നത്. അതുകൊണ്ടുതന്നെ ശക്തമായ പ്രവർത്തനങ്ങൾ കാഴ്ചവയ്ക്കാനാണ് പാർട്ടിയുടെ തീരുമാനം. നിയമസഭാ തിരഞ്ഞെടുപ്പിൽ ബിജെപിയ്ക്ക് ലഭിച്ച ജന പിന്തുണ പ്രവർത്തനങ്ങൾക്ക് ആത്മവിശ്വാസമേകും. ബൂത്ത് തലത്തിൽ തന്നെ പ്രവർത്തനങ്ങൾ ഏകോപിപ്പിക്കും. ഇതിന് പുറമേ കേന്ദ്രസർക്കാർ പ്രവർത്തനങ്ങൾ പരമാവധി ആളുകളിലേക്ക് എത്തിക്കുക, കേന്ദ്ര പദ്ധതികളുടെ ഗുണഭോക്താക്കളാക്കുക എന്നിവയും ലക്ഷ്യങ്ങളാണ്.
Comments