പശുവിൻ പാൽ കുടിക്കുന്നവരാണ് മിക്കയാളുകളും. പാലിന്റെ പോഷക ഗുണങ്ങൾ കണക്കിലെടുത്താണിത്. എന്നാൽ മറ്റ് ചിലർക്ക് ആട്ടിൻ പാലാണ് ഇഷ്ടം. അത്തരക്കാർ നിത്യേന കുടിക്കാൻ തിരഞ്ഞെടുക്കുന്നത് പശുവിൻ പാലിന് പകരം ആട്ടിൻ പാലായിരിക്കും. കാരണം ആട്ടിൻ പാലിന്റെ ഗുണങ്ങളറിഞ്ഞാൽ പിന്നെയാരും പശുവിൻ പാൽ കുടിക്കില്ലെന്നാണ് പറയുക. അത്രയേറെ ആരോഗ്യ ഗുണങ്ങളാണ് ആട്ടിൻപാലിനുള്ളത്. അതെന്താല്ലാമാണെന്ന് നോക്കാം..
1. ലാക്ടോസും പ്രോട്ടീനും വേണ്ടുവോളം ഉള്ളതിനാൽ ശരീരത്തിന്റെ വളർച്ചയ്ക്കും നല്ല ഹോർമോണുകളുടെ ഉത്പാദനത്തിനും ആട്ടിൻ പാൽ നല്ലതാണ്. അതിനാൽ കുട്ടികൾക്ക് ചെറുപ്പം മുതൽക്കെ ആട്ടിൻ പാൽ ശീലമാക്കാം.
2. ദിവസേന ആട്ടിൻ പാൽ കുടിച്ചാൽ പ്രതിരോധ ശേഷി വർധിക്കും.
3. നിരവധി അവശ്യ വിറ്റമിനുകളും മൈക്രോ ന്യൂട്രിയൻസും ആട്ടിൻ പാലിലുണ്ട്. വിറ്റമിൻ എ, ഡി, ബി12, അയേൺ, സിങ്ക്, കോപ്പർ എന്നിവ ആട്ടിൻപാലിൽ അടങ്ങിയിരിക്കുന്നു.
4. ആട്ടിൻ പാലിൽ ചീത്ത കൊഴുപ്പിന്റെ അംശം വളരെ കുറവാണ്.
5. പ്രോട്ടീന്റെ അളവ് താരതമ്യേന കൂടുതലായതുകൊണ്ട് തന്നെ പശുവിൻ പാലിന് മികച്ച ഒരു ബദൽ മാർഗം കൂടിയാണ് ആട്ടിൻ പാൽ.
6. ശരീരത്തിൽ ആന്റിബോഡികൾ ഉത്പാദിപ്പിക്കാൻ ആട്ടിൻ പാൽ സഹായിക്കുമെന്നതിനാൽ ഡെങ്കിപ്പനിയെ പ്രതിരോധിക്കാനും ഇത് സഹായിക്കും. ഡെങ്കിപ്പനി ബാധിച്ച് കിടക്കുന്നവർ ആട്ടിൻ പാൽ കുടിക്കുകയാണെങ്കിൽ വളരെ പെട്ടെന്ന് രോഗമുക്തി ഉണ്ടാകുമെന്നാണ് പറയപ്പെടുന്നത്.
7. ആന്റിബയോട്ടിക്കുകളോ ചീത്ത ഹോർമോണുകളോ ആട്ടിൻ പാലിൽ ഇല്ല.
8. ശരീരത്തിൽ അണുബാധയുണ്ടാകുന്നത് തടയാനും പ്രതിരോധിക്കാനും ആട്ടിൻ പാലിൽ അടങ്ങിയിരിക്കുന്ന ലാക്ടോട്രാൻസ്ഫെറിൻ സഹായിക്കുന്നു.
9. ആട്ടിൻപാലുകൊണ്ട് നിർമ്മിക്കുന്ന സോപ്പ് ചർമ്മത്തിന് ഏറ്റവും മികച്ചതാണെന്നും വിദഗ്ധർ പറയുന്നു. ചർമ്മത്തിൽ ജലാംശം സൂക്ഷിക്കാനും മൊയ്സ്ച്ചുറൈസ്ഡ് ആയി ഇരിക്കാനും ആട്ടിൻപാൽ സഹായിക്കും.
10. ദഹന പ്രക്രിയ സുഗമമാക്കാനും മസിലുകളെയും എല്ലുകളെയും ശക്തിപ്പെടുത്താനും ആട്ടിൻപാലിന് കഴിയും. ഭാരം കുറയ്ക്കണമെന്ന് ആഗ്രഹിക്കുന്നവർക്ക് ഭക്ഷണ ക്രമത്തിൽ ഉൾപ്പെടുത്താനും ആട്ടിൻ പാൽ മികച്ചതാണ്. കലോറി കുറവായതിനാലും ദഹിക്കാൻ എളുപ്പമായതിനാലും ആട്ടിൻ പാൽ അത്തരക്കാർക്ക് അനുയോജ്യമാണ്.
ആട്ടിൻ പാലിന് മണം കൂടുതലായതിനാൽ പലരും ഇതൊഴിവാക്കുകയാണ് പതിവ്. എന്നാൽ ഇതിന്റെ രുചി താൽപര്യപ്പെടുന്നവർക്ക് ദിവസവും ആട്ടിൻ പാൽ തന്നെ ശീലമാക്കാവുന്നതാണ്.
