ന്യൂഡൽഹി: മഹീന്ദ്ര ഗ്രൂപ്പ് ചെയർമാൻ ആനന്ദ് മഹീന്ദ്രയുടെ ട്വിറ്റർ പോസ്റ്റുകൾ പലപ്പോഴും ചർച്ചയാകാറുണ്ട്. ഇപ്പോഴിതാ അദ്ദേഹത്തെ മെൻഷൻ ചെയ്ത് ഒരു യുവാവ് പോസ്റ്റ് ചെയ്ത ട്വിറ്റർ വീഡിയോയ്ക്ക് ആനന്ദ് മഹീന്ദ്ര നൽകിയ മറുപടി തരംഗമാകുകയാണ്.
താൻ സ്വന്തമായി വികസിപ്പിച്ചെടുത്ത ഇലക്ട്രിക് ജീപ്പിന്റെ വളർച്ചയും വികാസവും ഒരു വീഡിയോ രൂപത്തിലാക്കി ട്വിറ്ററിൽ പങ്കുവെച്ചതായിരുന്നു ഗൗതം. ആനന്ദ് മഹീന്ദ്രയെ പരാമർശിച്ചായിരുന്നു ഗൗതം വീഡിയോ പോസ്റ്റ് ചെയ്തത്. തനിക്ക് ജോലി നൽകണമെന്ന അഭ്യർത്ഥനയും പോസ്റ്റിനോടൊപ്പം ഉണ്ടായിരുന്നു. ഓഗസ്റ്റ് 17-നായിരുന്നു ഗൗതം ഈ വീഡിയോ പോസ്റ്റ് ചെയ്തത്.
Electric jeep we seperately control front wheel and back wheel . please offer me job sir pic.twitter.com/gGAc0mQk3u
— A.GOWTHAM (@GOWTHAM6804) August 17, 2022
മൂന്നാം ദിവസം തന്നെ ഇതിന് മറുപടിയുമായി മഹീന്ദ്രഗ്രൂപ്പ് ചെയർപേഴ്സൺ എത്തി. ഗൗതമിന്റെ വീഡിയോ ഷെയർ ചെയ്ത അദ്ദേഹം ഇപ്രകാരം ട്വിറ്ററിൽ കുറിച്ചു. ഇന്ത്യ ഇലക്ട്രോണിക് വാഹന നിർമാണത്തിൽ ഒന്നാമതാകുമെന്ന് തനിക്ക് ബോധ്യമുണ്ട്. ഇക്കാര്യത്തിൽ നിലവിൽ മുൻപന്തിയിൽ നിൽക്കുന്നത് അമേരിക്കയാണ്. കാരണം കാറുകളോടും ടെക്നോളജിയോടുമുള്ള അവരുടെ അഭിനിവേശം വലുതാണ്. ഗൗതവും അദ്ദേഹത്തിന്റെ ചുറ്റുപാടുകളും സമൃദ്ധി നേടട്ടെയെന്നും ആനന്ദ് മഹീന്ദ്ര പറഞ്ഞു. കൂടാതെ മഹീന്ദ്രയുടെ ഓട്ടോമോട്ടീവ് ടെക്നോളജി പ്രസിഡന്റായ വേലു മഹീന്ദ്രയെ മെൻഷൻ ചെയ്ത് ഗൗതമിനെ ഉടൻ സമീപിക്കണമെന്ന് നിർദേശം നൽകുകയും ചെയ്തു.
തമിഴ്നാട്ടിലെ കീഴാദി എന്ന ഗ്രാമവാസിയാണ് ഗൗതം. നൂതനമായ രീതിയിൽ ആരെയും ആകർഷിപ്പിക്കുന്ന ജീപ്പായിരുന്നു ഗൗതം നിർമ്മിച്ചത്. മുമ്പിലെയും പിന്നിലെയും ചക്രങ്ങളെ വെവ്വേറെ നിയന്ത്രിക്കാൻ കഴിയുമെന്ന പ്രത്യേകതയും ഗൗതത്തിന്റെ ഇലക്ട്രോണിക് ജീപ്പിനുണ്ട്. തന്റെ കഴിവ് തെളിയിച്ച ഈ യുവാവിന് മഹീന്ദ്രയിൽ ജോലി ലഭിച്ചുകഴിഞ്ഞുവെന്നാണ് ആനന്ദ് മഹീന്ദ്രയുടെ ട്വീറ്റ് സൂചിപ്പിക്കുന്നത്.
