തിരുവനന്തപുരം; പുതിയ ചിത്രം ബ്രൂസ് ലീയുടെ കാസ്റ്റിംഗുമായി ബന്ധപ്പെട്ട് പ്രചരിക്കുന്ന വാർത്തകൾ പങ്കുവയ്ക്കരുതെന്ന് നടൻ ഉണ്ണി മുകുന്ദൻ. ഫേസ്ബുക്കിലൂടെയാണ് അദ്ദേഹം ആരാധകർക്ക് മുന്നറിയിപ്പുമായി ബന്ധപ്പെട്ടത്. ബ്രൂസ് ലീ, ഷെഫീക്കിന്റെ സന്തോഷം തുടങ്ങിയ ചിത്രങ്ങളിലെ കാസ്റ്റിംഗുമായി ബന്ധപ്പെട്ട വിവരങ്ങൾ അണിയറ പ്രവർത്തകർ ഔദ്യോഗികമായി പുറത്തുവിടുമെന്നും ഉണ്ണി മുകുന്ദൻ വ്യക്തമാക്കി.
‘ബ്രൂസ് ലീ’ എന്ന സിനിമയുടെ കാസ്റ്റിംഗുമായി ബന്ധപ്പെട്ട് പ്രചരിക്കുന്ന വാർത്തകൾ ഒന്നും ഷെയർ ചെയ്യരുത് എന്ന് വിനീതമായി എല്ലാവരോടും അഭ്യർത്ഥിക്കുന്നു. ബ്രൂസ് ലീ ആയാലും ഷെഫീക്കിന്റെ സന്തോഷം ആയാലും എന്റെ മറ്റേത് സിനിമയായാലും അതിന്റെ കാസ്റ്റിംഗ്, മറ്റു അപ്ഡേറ്റുകൾ എല്ലാം തന്നെ അതാത് സിനിമയുടെ അണിയറ പ്രവർത്തകർ പുറത്തു വിടുന്നതാണ്- ഉണ്ണി മുകുന്ദൻ ഫേസ്ബുക്കിൽ കുറിച്ചു.
ബ്രൂസ് ലീയിൽ ഉണ്ണി മുകുന്ദന്റെ വില്ലനായി ബിഗ് ബോസ് ഫെയിം ഡോ. റോബിൻ രാധാകൃഷ്ണൻ എത്തുന്നു എന്ന തരത്തിൽ ചില മാദ്ധ്യമങ്ങൾ വാർത്ത പ്രചരിപ്പിച്ചിരുന്നു. ഇതിന് പിന്നാലെ സമൂഹമാദ്ധ്യമങ്ങളിൽ ഇത് വലിയ ചർച്ചയായി. ഇതോടെയാണ് കാസ്റ്റിംഗ് സംബന്ധിച്ച വിവരങ്ങൾ ഔദ്യോഗികമായി പുറത്തുവിടുമെന്ന് ഉണ്ണി മുകുന്ദൻ വ്യക്തമാക്കിയത്.
മല്ലും സിംഗിന് ശേഷം വൈശാഖ്- ഉണ്ണി മുകുന്ദൻ കൂട്ടുകെട്ടിൽ ഒരുങ്ങുന്ന സിനിമയാണ് ബ്രൂസ് ലീ. ഗോകുലം മൂവീസിന്റെ ബാനറിൽ ഗോകുലം ഗോപാലനാണ് ചിത്രം നിർമ്മിക്കുന്നത്.
