കൊച്ചി: ചതുർദിന സന്ദർശനത്തിനായി ആർ എസ് എസ് സർസംഘചാലക് ഡോക്ടർ മോഹൻ ഭാഗവത് വ്യാഴാഴ്ച കേരളത്തിലെത്തും. നാളെ ഉച്ചയോടെ തിരുവനന്തപുരത്ത് എത്തുന്ന മോഹൻ ഭാഗവത് കൊല്ലം വള്ളിക്കാവിൽ മാതാ അമൃതാനന്ദമയിയെ സന്ദർശിക്കും. സംഘടനാപരമായ പരിപാടികളിൽ പങ്കെടുക്കുന്നതിനായാണ് മോഹൻ ഭാഗവത് കേരളത്തിൽ എത്തുന്നത്.
സെപ്റ്റംബർ 16. 17, 18 തീയതികളിൽ തൃശൂർ ജില്ലയിലെ വിവിധ പരിപാടികളിൽ ഡോക്ടർ മോഹൻ ഭാഗവത് പങ്കെടുക്കും. കൊച്ചിയിലെ ആർ എസ് എസ് പ്രാന്ത കാര്യാലയത്തിൽ നിന്നും 16ന് രാവിലെ എട്ടിന് തൃശൂർ ശങ്കരമഠത്തിലേക്ക് പോകും. സമൂഹത്തിന്റെ വ്യത്യസ്ത മേഖലകളിലെ പ്രമുഖരുമായി അദ്ദേഹം കൂടിക്കാഴ്ച നടത്തും.
18ന് രാവിലെ മുതൽ ഗുരുവായൂർ രാധേയം ഓഡിറ്റോറിയത്തിൽ ചേരുന്ന ആർ എസ് എസ് ബൈഠക്കിൽ പങ്കെടുക്കും. വൈകുന്നേരം 5ന് ഗുരുവായൂർ ശ്രീകൃഷ്ണ കോളേജ് ഗ്രൗണ്ടിൽ ഗുരുവായൂർ സംഘ ജില്ലയിലെ പൂർണ്ണ ഗണവേഷധാരികളായ പ്രവർത്തകരുടെ സാംഘിക്കിൽ ഡോക്ടർ മോഹൻ ഭാഗവത് സംസാരിക്കും.
