തൃശൂർ: ഗുരുവായൂർ ക്ഷേത്രത്തിൽ ദർശനം നടത്തി പ്രമുഖ വ്യവസായിയും റിലയൻസ് ഇൻഡ്രസ്ട്രീസ് ചെയർമാനുമായ മുകേഷ് അംബാനി. ഒന്നരക്കോടി രൂപ കാണിക്കയായി നൽകി. വൈകീട്ടോടെയായിരുന്നു അദ്ദേഹം ഭാവി മരുമകൾ രാധിക മർച്ചന്റിനൊപ്പം ക്ഷേത്രത്തിൽ എത്തിയത്.
ഹെലികോപ്റ്ററിൽ ഗുരുവായൂർ ശ്രീകൃഷ്ണ കോളേജിൽ എത്തിയ മുകേഷ് അംബാനി റോഡ് മാർഗ്ഗമാണ് ക്ഷേത്രത്തിൽ എത്തിയത്. ദേവസ്വം ചെയർമാൻ വി.കെ വിജയനും മറ്റ് ഭാരവാഹികളും ചേർന്ന് സ്വീകരിച്ചു. ചെക്കായാണ് അദ്ദേഹം പണം കൈമാറിയത്. 1 കോടി 51 ലക്ഷത്തിന്റേതാണ് ചെക്ക്. ക്ഷേത്രത്തിലെ അന്നദാനത്തിന് വേണ്ടിയാകും ദേവസ്വം ബോർഡ് ഈ തുക ചിലവഴിക്കുക. ക്ഷേത്രത്തിൽ വഴിപാടുകൾ കഴിച്ച ശേഷമായിരുന്നു അദ്ദേഹം മടങ്ങിയത്. റിലയൻസ് ഗ്രൂപ്പ് ഡയറക്ടർ മനോജ് മോദിയും അദ്ദേഹത്തിനൊപ്പം ക്ഷേത്രത്തിൽ എത്തിയിരുന്നു.
കാണിക്ക നൽകിയതിൽ അതിയായ സന്തോഷമുണ്ടെന്ന് വി.കെ വിജയൻ മാദ്ധ്യമങ്ങളോട് പ്രതികരിച്ചു. ഗുരുവായൂർ ദർശനം കഴിഞ്ഞ് മുകേഷ് അംബാനി മടങ്ങി. കാണിക്കയായി അദ്ദേഹം ചെക്ക് സമർപ്പിച്ചിരുന്നു. 1 കോടി 51 ലക്ഷത്തിന്റെ ചെക്കാണ് നൽകിയത്. ഈ തുക അന്നദാനത്തിന് വേണ്ടി ചിലവഴിക്കാനാണ് അദ്ദേഹം ആവശ്യപ്പെട്ടത്. ഇത് പ്രകാരം ചെയ്യും. ആദ്യമായാണ് ക്ഷേത്രത്തിൽ ഇത്രയും വലിയ തുക കാണിക്കയായി ലഭിക്കുന്നത് എന്നും അദ്ദേഹം വ്യക്തമാക്കി.
