കോഴിക്കോട്: പോപ്പുലർ ഫ്രണ്ട് റാലിയിലെ വിവാദ പ്രസംഗത്തിനെതിരെ വിമർശനവുമായി വിവിധ മുസ്ലിം സംഘടനകൾ രംഗത്ത്. ഹദീസിനെ വളച്ചൊടിച്ച് അവതരിപ്പിച്ച് ഇസ്ലാം മത വിശ്വാസികളെ തെറ്റിദ്ധരിപ്പിക്കുന്ന പ്രവർത്തിയാണിതെന്ന് മുസ്ലിം സംഘടനകൾ വ്യക്തമാക്കി. ഹദീസിലെ ആശയത്തെ അഫ്സൽ ഖാസിമി വളച്ചൊടിക്കുകയാണ് ചെയ്തതെന്ന് എസ് വൈ എസ് നേതാവ് നാസർ ഫൈസി കൂടത്തായി പറഞ്ഞു. പ്രവാചക ചരിത്രം മുഴുവൻ പറയാതെ അണികളിൽ പൊട്ടിത്തെറി ഉണ്ടാക്കാനുള്ള ശ്രമമാണ് പോപ്പുലർ ഫ്രണ്ട് നടത്തിയതെന്ന് എസ്കെഎസ്എസ്എഫ് സംസ്ഥാന ജനറൽ സെക്രട്ടറി സത്താർ പന്തല്ലൂർ വിമർശിച്ചു.
പ്രവാചകചരിത്രം പറയുമ്പോൾ യഥാർത്ഥ വശമാണ് ഉദ്ധരിക്കേണ്ടത്. ഭാഗികമായോ വളച്ചൊടിച്ചോ പറയുമ്പോൾ അതുകൊണ്ട് ഉണ്ടാകുന്ന അപകടങ്ങൾ മനസിലാക്കണമെന്ന് ഇകെ സമസ്ത നേതാവ് അബ്ദുസമദ് പൂക്കോട്ടൂർ പറഞ്ഞു. സംഘടന വളർത്താൻ വേണ്ടി ചിലർ ഹദീസ് സംബന്ധിച്ച് തെറ്റിദ്ധാരണ പരത്തുകയാണെന്ന് എപി സമസ്ത നേതാവ് പേരോട് അബ്ദു റഹ്മാൻ സഖാഫിയും പറഞ്ഞു.
പ്രവാചകൻ മുഹമ്മദ് നബിയെക്കുറിച്ച് കോഴിക്കോട് നടന്ന ജനമഹാസമ്മേളനത്തിൽ ഓൾ ഇന്ത്യ ഇമാംസ് കൗൺസിൽ സംസ്ഥാന ജനറൽ സെക്രട്ടറി അഫ്സൽ ഖാസിമി നടത്തിയ പ്രസംഗമാണ് വിമർശനത്തിനിടയാക്കിയത്. ഇതിനെതിരെ വിമർശനവുമായി സമസ്ത നേരത്തെ രംഗത്തെത്തിയിരുന്നു. എന്നാൽ വിഷയം ചർച്ചയായതോടെ പോപ്പുലർ ഫ്രണ്ടിനെതിരെ മറ്റ് മുസ്ലിം സംഘടനകളും അണിനിരന്നിട്ടുണ്ട്.
ശത്രുക്കൾക്കെതിരെ പോരാടി രക്തസാക്ഷിത്വം വരിക്കണമെന്ന രീതിയിൽ പോപ്പുലർ ഫ്രണ്ട് നേതാവ് അഫ്സൽ ഖാസിമി നടത്തിയ പ്രസംഗം വിശ്വാസികളെ തെറ്റിദ്ധരിപ്പിക്കുന്നതാണെന്ന് സമസ്ത നേതാക്കൾ കുറ്റപ്പെടുത്തിയിരുന്നു. സംഘപരിവാറിനെ ശക്തമായി പ്രതിരോധിക്കണമെന്നും വേണ്ടിവന്നാൽ രക്തസാക്ഷിത്വം വരിക്കണമെന്നുമായിരുന്നു അഫ്സൽ ഖാസിമിയുടെ പ്രസംഗം.
മുസ്ലീം സംഘടനകളുടെ എതിർപ്പ് പോപ്പുലർ ഫ്രണ്ടിന് വെല്ലുവിളിയാകും എന്ന കാര്യത്തിൽ സംശയമില്ല. മുസ്ലീം സമുദായം ഒപ്പമുണ്ടെന്ന് പൊതുസമൂഹത്തെ വിശ്വസിപ്പിക്കാൻ കിണഞ്ഞു പരിശ്രമിച്ചുകൊണ്ടിരിക്കുകയാണ് പോപ്പുലർ ഫ്രണ്ട്. അതിനായി മസ്ജിദുകൾ കേന്ദ്രീകരിച്ച് സാമൂഹ്യസേവന പ്രവർത്തനങ്ങളും , മറ്റ് പരിപാടികളും പോപ്പുലർ ഫ്രണ്ട് സംഘടിപ്പിക്കുന്നുണ്ട്. മുസ്ലീം സമുദായത്തെ തങ്ങളുടെ നിയന്ത്രണത്തിൽ കൊണ്ടുവരാനാണ് പോപ്പുലർ ഫ്രണ്ട് ശ്രമിച്ചുകൊണ്ടേയിരിക്കുന്നത്. എന്നാൽ കേരളത്തിൽ നടക്കുന്ന അക്രമ സംഭവങ്ങളിൽ പോപ്പുലർ ഫ്രണ്ടിനെതിരെ മറ്റ് മുസ്ലിം സംഘടനകൾ വിമർശമനമുന്നയിച്ചിരുന്നു. ഇതിന് പിന്നാലെയാണ് ഹദീസിനെ വളച്ചൊടിച്ചുകൊണ്ടുള്ള പോപ്പുലർ ഫ്രണ്ടിന്റെ കലാപ ആഹ്വാനവും. അക്രമ രാഷ്ട്രീയം ഇസ്ലാമിന്റെ നയമല്ലെന്നാണ് ഇക്കാര്യത്തിൽ സുന്നി സംഘടനകൾ തുറന്നടിച്ചിരിക്കുന്നത്.
