ആഷിഷ് ശർമ്മയെ നായകനാക്കി കരൺ റസ്ദാൻ സംവിധാനം ചെയ്യുന്ന ‘ഹിന്ദുത്വ ചാപ്റ്റർ 1: മെയ്ൻ ഹിന്ദു ഹൂൺ’ എന്ന ചിത്രത്തിന്റെ ട്രെയിലർ പുറത്തിറക്കി. ഭാരതത്തിന്റെ സമകാലിക സംഭവവികാസങ്ങളിലൂടെയാണ് സിനിമ കഥ പറഞ്ഞു പോകുന്നത്. രാജ്യത്തിന്റെ സംസ്കാരത്തിലും സനാതന ധർമ്മത്തിലും അഭിമാനിക്കണമെന്ന സന്ദേശം ചിത്രം മുന്നോട്ട് വെയ്ക്കുന്നു. ഒപ്പം രാജ്യത്ത് പടർന്നുപിടിക്കുന്ന അരാജകത്വത്തെ കുറിച്ചും ഇസ്ലാമിക തീവ്രവാദത്തെപ്പറ്റിയും സിനിമ സംസാരിക്കുന്നു. ലൗ ജിഹാദ് അടക്കമുള്ള സംഭവങ്ങളെയും സിനിമയിൽ പ്രധാന വിഷയമായി അവതരിപ്പിക്കുന്നുണ്ട്. പെൺകുട്ടികൾ അവരുടെ സൗഹൃദങ്ങളും പ്രണയ ബന്ധങ്ങളും തിരഞ്ഞെടുക്കുമ്പോൾ ജാഗ്രത പുലർത്തണമെന്ന സന്ദേശവും സിനിമ മുന്നോട്ട് വെയ്ക്കുന്നു. ട്രെയിലറിന് വലിയ സ്വീകരണമാണ് ജനങ്ങൾക്കിടയിൽ നിന്നും ലഭിക്കുന്നത്.
ഇസ്ലാമിക തീവ്രവാദം, വിദ്യാർത്ഥി രാഷ്ട്രീയത്തിന്റെ മറവിൽ രാജ്യത്തെ കലാലയങ്ങളിൽ വളർത്തിയെടുക്കുന്ന രാജ്യവിരുദ്ധ പ്രവർത്തനങ്ങൾ, ഭാരതത്തിൽ അരക്ഷിതാവസ്ഥ സൃഷ്ടിക്കാൻ ആസൂത്രിതമായി നടപ്പാക്കുന്ന വർഗീയ സംഘർഷങ്ങൾ, കശ്മീരിലെ തീവ്രവാദ പ്രവർത്തനങ്ങൾ, ആർട്ടിക്കിൾ 370 എന്നിങ്ങനെ നിരവധി വിഷയങ്ങൾ ചർച്ച ചെയ്യുന്ന ചിത്രമായിരിക്കും ‘ഹിന്ദുത്വ ചാപ്റ്റർ 1: മെയ്ൻ ഹിന്ദു ഹൂൺ’ എന്ന് ട്രെയിലർ സൂചിപ്പിക്കുന്നു. നടൻ ആഷിഷ് ശർമ്മയ്ക്കൊപ്പം സോനാരിക ഭദോറിയ, അങ്കിത് രാജ് എന്നിവരും പ്രധാന കഥാപാത്രങ്ങളെ അവതരിപ്പിക്കുന്നു. മാത്രമല്ല, പ്രശസ്ത ഭജൻ ഗായകൻ അനുപ് ജലോട്ട, രാമായണം താരം ദീപിക ചിഖ്ലിയ, മുതിർന്ന നടൻ ഗോവിന്ദ് നാംദേവ് എന്നിവരും ചിത്രത്തിന്റെ ഭാഗമാകുന്നുണ്ട്.
പ്രണയം, സൗഹൃദം, വിദ്യാർത്ഥി രാഷ്ട്രീയം, ഹിന്ദുമതത്തിന്റെ യഥാർത്ഥ സത്ത എന്നിവ ചർച്ച ചെയ്യുന്ന ചിത്രമായിരിക്കും ഹിന്ദുത്വ എന്ന് സംവിധായകൻ കരൺ റസ്ദാൻ പറഞ്ഞു. രാജ്യത്തെ ചില ഹിന്ദുക്കൾക്ക് അറിയാത്ത, അവർ മറന്നു പോയ ഹിന്ദുമതത്തെ കുറിച്ച് സിനിമ സംസാരിക്കും. ഹിന്ദുമതവും ഹിന്ദുത്വവും തമ്മിൽ വലിയ വ്യത്യാസമുണ്ടെന്നാണ് മാദ്ധ്യമങ്ങളും രാഷ്ട്രീയ പാർട്ടികളും ചർച്ച ചെയ്യുന്നത്. അതിനെല്ലാം ഒരു ഉത്തരമായിരിക്കും ഹിന്ദുത്വ ചാപ്റ്റർ 1: മെയ്ൻ ഹിന്ദു ഹൂൺ എന്ന് സംവിധായകൻ വ്യക്തമാക്കി. ഹിന്ദുമതം സമാധാനപരമായ ഒരു ജീവിതരീതിയാണെന്നിരിക്കെ, അതിനെ തീവ്രവാദമായി പരാമർശിക്കുന്നവർക്കുളള മറുപടി കൂടിയായിരിക്കും സിനിമ എന്നും അദ്ദേഹം കൂട്ടിച്ചേർത്തു. ഒക്ടോബർ 7-ന് ചിത്രം തിയറ്ററുകളിൽ എത്തും.
Comments