ശരീരത്തിനും മനസിനും തണുപ്പും ഊർജ്ജവും നൽകുന്ന ഒന്നാണ് കുളി. മലയാളികൾക്ക് ഏറ്റവും പ്രിയപ്പെട്ട ഒരു ദിനചര്യയും ഇത് തന്നെയായിരിക്കും. ദിവസം രണ്ട് തവണ മുതൽ നാല് തവണ വരെ കുളിക്കുന്നവരാണ് നമ്മൾ മലയാളികൾ. ആരോഗ്യത്തിന് ഏറെ ഗുണം ചെയ്യുന്ന ഈ പ്രവൃത്തി ക്ഷീണം ഇല്ലാതാക്കുകയും പ്രസരിപ്പ് നൽകുകയും ചെയ്യുന്നു. എന്നാൽ ശരീരത്തിലൂടെ വെറുതെ കുറച്ച് വെള്ളമെടുത്ത് ഒഴിച്ചാൽ അത് കുളിയാകില്ല. അതിന്റെ ഗുണങ്ങൾ ലഭിക്കണമെങ്കിൽ ആരോഗ്യവശങ്ങൾ അറിഞ്ഞ് തന്നെ കുളിക്കണം.
ശരീരത്തിന് ഉന്മേഷമേകുന്നതാണെങ്കിലും തെറ്റായ രീതിയിൽ കുളിച്ചാൽ ഇത് ആരോഗ്യത്തെ ബാധിക്കും എന്നാണ് ആയുർവ്വേദത്തിൽ പറയുന്നത്. ഈ തെറ്റുകളിൽ ആദ്യത്തേത് തലയിൽ ആദ്യം വെള്ളം ഒഴിക്കുന്നതാണ്. ഇന്ന് മിക്കവരും ഷവറിനടിയിൽ നിന്ന് കുളിക്കുന്നവരാണ്. അതുകൊണ്ട് തന്നെ ആദ്യം നനയ്ക്കുക ശിരസായിരിക്കും. എന്നാൽ ഇത് വിവിധ തരത്തിലുള്ള ആരോഗ്യപ്രശ്നങ്ങൾക്ക് കാരണമാകുമെന്ന് ആയുർവേദത്തിൽ പറയുന്നു. കാരണം നേരിട്ട് തലയിൽ വെള്ളമൊഴിക്കുമ്പോൾ തലവേദന പോലുള്ള അസ്വസ്ഥതകൾ ഉണ്ടാകാൻ സാധ്യതയുണ്ട്.
കുളിക്കുമ്പോൾ ആദ്യം പാദം മുതൽ വെള്ളം മുകളിലേക്ക് ഒഴിച്ചു വേണം കുളി ആരംഭിക്കാൻ. അതായത് കാലിൽ വെള്ളമൊഴിച്ച് വേണം കുളിക്കാൻ തുടങ്ങാൻ. കാരണം കാലിൽ വെള്ളമൊഴിക്കുന്നത് വഴി തണുപ്പ് വരുന്നുണ്ടെന്ന് തലച്ചോറിനെ അറിയിക്കാനാകും. അല്ലെങ്കിൽ ജലദോഷം, നീർക്കെട്ട് പോലെയുള്ള അസുഖങ്ങൾ പിടിപെടും. സ്ട്രോക്ക് വരെ ഉണ്ടാകാനും സാധ്യത ഏറെയാണ്.
കാരണം നമ്മുടെ ശരീരം പൊതുവേ ചൂടുളളതാണ്. അതിനിടെ തലയിലേക്ക് പെട്ടെന്ന് തണുത്ത വെള്ളം വീഴുമ്പോൾ ശരീരം അതിവേഗം ശരീരോഷ്മാവ് ക്രമപ്പെടുത്താൻ ശ്രമിക്കും. ഇതിന്റെ ഫലമായി രക്തയോട്ടം അതിവേഗത്തിലാക്കും. ഇത് പതിവായാൽ തലച്ചോറിലെ രക്തക്കുഴൽ പൊട്ടുന്നതുൾപ്പെടെയുളള പ്രശ്നങ്ങളിലേക്ക് ക്രമേണ നയിച്ചേക്കാം.
അതിനാൽ കുളിക്കുമ്പോൾ ആദ്യം ശരീരം നനച്ച ശേഷം മാത്രമേ തല നനയ്ക്കാവൂ. ഉയർന്ന രക്തസമ്മർദം, കോളസ്ട്രോൾ, മൈഗ്രേൻ ഉൾപ്പെടെയുള്ള അസുഖങ്ങൾ ഉള്ളവർ ഈ രീതി പിന്തുടരണം.
അതുപോലെ തന്നെ കുളി കഴിഞ്ഞ് തോർത്തുന്ന കാര്യത്തിലും ശ്രദ്ധ വേണം. കുളി കഴിഞ്ഞാൽ ആദ്യം തലയല്ല തോർത്തേണ്ടത്. തല തോർത്തുന്നതിന് മുൻപ് നാം മുതുക് തോർത്തണം. ആദ്യം തല തോർത്തി തുടങ്ങുന്നത് ആരോഗ്യത്തിന് അത്ര നല്ലതല്ലെന്നാണ് ആയുർവേദത്തിൽ പറയുന്നത്.
Comments