മമ്മൂട്ടി ആരാധകരും സിനിമാ പ്രേമികളും ഏറെ ആകാംക്ഷയോടെ കാത്തിരിക്കുന്ന ചിത്രമാണ് റോഷാക്ക്. നാളെ(ഒക്ടോബർ 7) ന് ചിത്രം റിലീസ് ചെയ്യാനിരിക്കെ റോഷാക്കിന്റെ പ്രീ റിലീസ് ടീസർ അണിയറ പ്രവർത്തകർ പുറത്തുവിട്ടു. നിസാം ബഷീർ സംവിധാനം ചെയ്യുന്ന ചിത്രം പേരിലെ കൗതുകം കൊണ്ടു തന്നെ ശ്രദ്ധ നേടിയിരുന്നു. പിന്നാലെ പുറത്തിറക്കിയ നിഗൂഢതകൾ നിറഞ്ഞ പോസ്റ്ററുകളും ട്രെയിലറും സിനിമാ പ്രേമികളെ അവേശത്തിലാക്കി. റിലീസിന് മണിക്കൂറുകൾ മാത്രം ബാക്കി നിൽക്കെയാണ് ഇപ്പോൾ പുതിയ ടീസറും പുറത്തു വന്നിരിക്കുന്നത്. സിനിമാ പ്രേമികളെ ത്രില്ലടിപ്പിക്കുന്ന തരത്തിലാണ് ടീസർ ഒരുക്കിയിരിക്കുന്നത്. മമ്മൂട്ടിയുടെ ഏറെ വ്യത്യസ്തമായ ഒരു കഥാപാത്രത്തിനായിരിക്കും പ്രേക്ഷകർ സാക്ഷ്യം വഹിക്കുക എന്ന് ടീസർ ഉറപ്പ് നൽകുന്നു.
‘കെട്ട്യോളാണ് എന്റെ മാലാഖ’ എന്ന വിജയ ചിത്രത്തിന് ശേഷം നിസാം ബഷീർ സംവിധാനം ചെയ്യുന്ന സിനിമയാണ് റോഷാക്ക്. അഡ്വഞ്ചേഴ്സ് ഓഫ് ഓമനക്കുട്ടൻ, ഇബിലീസ് തുടങ്ങിയ ചിത്രങ്ങളുടെ തിരക്കഥ എഴുതിയ സമീർ അബ്ദുൾ ആണ് റോഷാക്കിന്റെ തിരക്കഥാകൃത്ത്. ലൂക്ക് ആൻറണി എന്ന ഏറെ നിഗൂഢതകൾ നിറഞ്ഞ ഒരു കഥാപാത്രത്തെയാണ് ചിത്രത്തിൽ മമ്മൂട്ടി അവതരിപ്പിച്ചിരിക്കുന്നത്. അതിഥി വേഷത്തിൽ ആസിഫ് അലിയും എത്തുന്നുണ്ട്. ഇരുവരെയും കൂടാതെ ഷറഫുദ്ധീൻ, ജഗദീഷ്, ഗ്രേസ് ആന്റണി, ബിന്ദു പണിക്കർ, കോട്ടയം നസീർ, ബാബു അന്നൂർ , മണി ഷൊർണ്ണൂർ തുടങ്ങിയവർ ചിത്രത്തിൽ അണിനിരക്കുന്നു.
മമ്മൂട്ടിയുടെ നിർമ്മാണ സംരംഭമായ മമ്മൂട്ടി കമ്പനി ആണ് ചിത്രം നിർമ്മിക്കുന്നത്. ഡാർക് ത്രില്ലർ ഗണത്തിൽ പെടുന്ന ചിത്രം ദുൽഖർ സൽമാന്റെ ഉടമസ്ഥതയിലുള്ള വേഫെറർ ഫിലിംസാണ് തിയറ്ററുകളിൽ എത്തിക്കുന്നത്. കൊച്ചിയിലും ദുബൈയിലുമായിട്ടാണ് ചിത്രത്തിന്റെ ഷൂട്ടിംഗ് പൂർത്തീകരിച്ചത്. നിമീഷ് രവിയാണ് ചിത്രത്തിന്റെ ഛായാഗ്രഹണം നിർവഹിക്കുന്നത്. സംഗീത സംവിധാനം നിർവഹിക്കുന്നത് മിഥുൻ മുകുന്ദൻ ആണ്.
Comments