മുംബൈ : ട്രെയിനിൽ യുവതിയോട് അപമര്യാദയായി പെരുമാറിയ രണ്ട് കോൺഗ്രസ് എംഎൽഎമാർക്കെതിരെ പോലീസ് കേസെടുത്തു. മദ്ധ്യപ്രദേശിലെ കാട്മയിൽ നിന്നുള്ള സുനിൽ സറഫിറിനും സത്നയിൽ നിന്നുള്ള സിദ്ധാർത്ഥ് കുശ്വാഹക്കും എതിരെയാണ് പോലീസ് കേസെടുത്തത്. റെവാഞ്ചൽ എക്സ്പ്രസിൽ യാത്ര ചെയ്ത യുവതിയുടെ പരാതിയുടെ അടിസ്ഥാനത്തിലാണ് ഇരുവർക്കുമെതിരെ പോലീസ് കേസെടുത്തത്.
റെവാഞ്ചൽ എക്സ്പ്രസിന്റെ എസി കോച്ചിലാണ് വ്യാഴാഴ്ച കേസിനാസ്പദമായ സംഭവം നടന്നത്. കൈക്കുഞ്ഞുമായാണ് പരാതിക്കാരിയായ യുവതി ട്രെയിനിൽ യാത്ര ചെയ്തത്. കർണിയിൽ നിന്ന് എംഎൽഎമാർ ട്രെയിനിൽ കയറുകയായിരുന്നു്. ഈ സമയം ഇരുവരും മദ്യ ലഹരിയിൽ ആയിരുന്നു .
തുടർന്നാണ് യുവതിയോട് എംഎൽഎമാർ അപമര്യാദയായി പെരുമാറിയത്. ഇതിന് പിന്നാലെ യുവതി ഭർത്താവിനെ വിളിച്ച് എംഎൽഎമാരുടെ പെരുമാറ്റത്തെ കുറിച്ച് അറിയിക്കുകയായിരുന്നു. ഇതിന്റെ അടിസ്ഥാനത്തിൽ യുവതിയുടെ ഭർത്താവ് സംഭവത്തെ കുറിച്ചുള്ള വിവരങ്ങൾ റെയിൽവേ മന്ത്രാലയത്തിന്റെയും റെയിൽവേ പോലീസിന്റെയും ട്വിറ്ററിൽ ടാഗ് ചെയ്യുകയായിരുന്നു.
ഇതിന് പിന്നാലെയാണ് എംഎൽഎമാർക്കെതിരെ പോലീസ് കേസെടുത്തത്. സ്ത്രീത്വത്തെ അപമാനിച്ചതിനാണ് ഇവർക്കെതിരെ കേസെടുത്തതെന്ന് പോലീസ് അറിയിച്ചു. കൂടാതെ യാത്രയുടെ ഇടയിൽ യുവതിക്ക് സീറ്റ് മാറ്റി നൽകിയെന്നും ഉദ്യോഗസ്ഥർ വ്യക്തമാക്കി.
