ഡൽഹി: റിലയൻസ് ഇൻഡസ്ട്രീസ് (ആർഐഎൽ) ചെയർമാനും ഏഷ്യയിലെ രണ്ടാമത്തെ വലിയ ധനികനുമായ മുകേഷ് അംബാനി സിംഗപ്പൂരിൽ ഫാമിലി ഓഫീസ് തുറക്കുന്നുവെന്ന് റിപ്പോർട്ടുകൾ. ഓഫീസ് ആരംഭിച്ചതിന് പുറമെ, പ്രവർത്തനങ്ങൾക്ക് മേൽനോട്ടം വഹിക്കാൻ പുതിയ മാനേജരെയും നിയോഗിച്ചു എന്നാണ് പുറത്തു വരുന്ന വാർത്തകൾ. ഒരു വർഷത്തിനുള്ളിൽ തന്നെ ഓഫീസിന്റെ പ്രവർത്തനം ആരംഭിക്കാനാണ് നീക്കം. സമീപ വർഷങ്ങളിലായ് സിംഗപ്പൂരിൽ ബിസിനസ്സ് അടിത്തറ സ്ഥാപിച്ച അതി സമ്പന്നരുടെ പട്ടികയിലെ പുതിയ വ്യക്തിയാണ് മുകേഷ് അംബാനി.
2020 നവംബറിൽ ഹെഡ്ജ് ഫണ്ട് കോടീശ്വരനായ റേ ഡാലിയോ തന്റെ ഏഷ്യൻ നിക്ഷേപങ്ങൾ കൈകാര്യം ചെയ്യുന്നതിനായി സിംഗപ്പൂരിൽ ഫാമിലി ഓഫീസ് സ്ഥാപിച്ചിരുന്നു. ഇതിന് മുമ്പ് 2019-ൽ കോടീശ്വരൻ ജെയിംസ് ഡൈസനും സിംഗപ്പൂരിൽ ഓഫീസ് തുടങ്ങിയിരുന്നു. ഗൂഗിൾ സഹസ്ഥാപകൻ സെർജി ബ്രിനും അവരുടെ പാത പിന്തുടർന്ന് 2021 ഫെബ്രുവരിയിൽ നഗരത്തിൽ ഒരു ഫാമിലി ഓഫീസ് സ്ഥാപിച്ചു.
ആഗോള ശതകോടീശ്വരന്മാരും ഉന്നത സാമ്പത്തിക ശ്രേണിയിൽപ്പെടുന്നവരും ഏഷ്യയിലെ ഏറ്റവും മികച്ച സാമ്പത്തിക കേന്ദ്രങ്ങളിലൊന്നായി വിലയിരുത്തപ്പെടുന്ന സിംഗപ്പൂരിൽ ഫാമിലി ഓഫീസുകൾ സ്ഥാപിച്ചു വരുന്നു. ഇതിനോടകം സിഗംപ്പൂരിൽ ഫാമിലി ഓഫീസുകളുടെ എണ്ണം വർദ്ധിച്ചിട്ടുണ്ട്. സിംഗപ്പൂരിലെ ഫാമിലി ഓഫീസുകളുടെ എണ്ണം 2017-നും 2019-നും ഇടയിൽ അഞ്ചിരട്ടിയായി ഉയർന്നു. 2020-ന്റെ അവസാനത്തിൽ 400-ൽ നിന്നും 2021-ൽ 700 ആയി ഫാമിലി ഓഫീസുകളുടെ എണ്ണം ഉയർന്നതായാണ് റിപ്പോർട്ടുകൾ.
