മലപ്പുറം: മലപ്പുറത്ത് കാക്കഞ്ചേരിയിലെ പള്ളിക്കൽ ക്ഷേത്രത്തിന് നേരെ സാമൂഹ്യവിരുദ്ധരുടെ ആക്രമണം. മണക്കാട് പള്ളിക്കൽ മഹാശിവക്ഷേത്രത്തിലെ പൂട്ടും ഗ്രില്ലു തകർത്ത് അക്രമികൾ അതിക്രമിച്ച് കയറുകയായിരുന്നു. തുടർന്ന് ക്ഷേത്രവളപ്പിനുള്ളിലെ ക്ഷേത്രക്കിണറിന്റെ തൂണുകൾ തകർത്തു. പൂജയ്ക്കും മറ്റും വെള്ളം എടുത്തിരുന്ന കിണറാണിത്.
രാവിലെ ക്ഷേത്രത്തിലെത്തിയ ജീവനക്കാരാണ് സംഭവം കണ്ടത്.പിന്നാലെ ക്ഷേത്രം ഭാരവാഹികൾ തേഞ്ഞിപ്പാലം പോലീസിൽ പരാതി നൽകി. ക്ഷേത്രവുമായി ബന്ധപ്പെട്ട് സമീപവാസികളുമായി തർക്കം നിലനിൽക്കുന്നുണ്ട്.
ക്ഷേത്രത്തിന് ചുറ്റമുള്ള ഭൂമി സമീപവാസികൾ കൈയ്യേറിയതാണെന്നാണ് ഭക്തരുടെ പരാതി. ഇക്കാരണത്താൽ ആക്രമണം ആസൂത്രിതമാണെനന് ഭക്തർ ആരോപിച്ചു. ക്ഷേത്രസംരക്ഷണസമിതിയ്ക്ക് കീഴിലുള്ള പള്ളിക്കൽ ശിവക്ഷേത്രം ഈ അടുത്ത കാലത്താണ് പുനരുദ്ധാരണം ചെയ്തത്.
ഇന്നലെ സമാനമായ രീതിയിൽ പത്തനംതിട്ട കലഞ്ഞൂരിൽ ശിവക്ഷേത്രത്തിന് നേരെ ആക്രമണമുണ്ടായിരുന്നു. കഞ്ചാവ് ലഹരിയിൽ ക്ഷേത്രവാതിൽ ചവിട്ടി തുറന്ന് അതിക്രമം കാണിച്ച് മങ്കോട്ട് സ്വദേശി ഷമീറിനെ പോലീസ് പിടികൂടിയിരുന്നു.അറസ്റ്റിലായ ഇയാൾക്കെതിരെ കലാപാഹ്വാനം ചെയ്തതിന് പോലീസ് കേസെടുത്തിരുന്നു. 1100 വർഷം പഴക്കമുള്ള ക്ഷേത്രമാണ് ഇയാൾ ഇരുട്ടിന്റെ മറവിൽ ആക്രമിച്ചത്.
