ഇസ്ലാമാബാദ് : യുഎസ് പ്രസിഡന്റ് ജോ ബൈഡന്റെ പാകിസ്താനെക്കുറിച്ചുളള പരാമർശത്തിന് മറുപടിയുമായി പാക് പ്രധാനമന്ത്രി ഷെഹബാസ് ഷെരീഫ്. പാകിസ്താൻ ഏറ്റവും അപകടകാരിയായ രാജ്യങ്ങളിൽ ഒന്നാണ് എന്നാണ് ജോ ബൈഡൻ പറഞ്ഞത്. ഇതിനെ തള്ളിക്കൊണ്ട് ആണ് ഷെഹബാസ് ഷെരീഫ് രംഗത്തെത്തിയിരിക്കുന്നത്.
പാകിസ്താൻ വളരെ ഉത്തരവാദിത്വമുളള ഒരു രാജ്യമാണെന്ന് ഷെഹബാസ് ഷെരീഫ് പറഞ്ഞു. കഴിഞ്ഞ ഒരു ദശകമായി രാജ്യം ഇത് തെളിയിക്കുന്നുണ്ട്. രാജ്യത്തിന്റെ ആണവ സംവിധാനം മികച്ച സാങ്കേതിക സംവിധാനങ്ങളിലൂടെയാണ് പ്രവർത്തിപ്പിക്കുന്നത് എന്നും ഷെരീഫ് അവകാശപ്പെട്ടു.
പാകിസ്താൻ തങ്ങളുടെ ആണവ-ആയുധ ശേഷിയും പരിപാലനവും നിരവധി തവണ പ്രകടമാക്കിയിട്ടുണ്ട്. ആണവോർജ സുരക്ഷയുമായി ബന്ധപ്പെട്ട് ലോകത്തോടുള്ള പ്രതിബദ്ധതയാണ് ഇതിലൂടെ വ്യക്തമാക്കുന്നത്.
അമേരിക്കയുമായി എന്നും മികച്ച ബന്ധം പുലർത്തിയിരുന്ന രാജ്യമാണ് പാകിസ്താൻ. ആഗോള തലത്തിൽ വെല്ലുവിളികൾ നേരിടുന്ന ആ സാഹചര്യത്തിൽ അനാവശ്യമായ അഭിപ്രായപ്രകടനങ്ങൾ ഒഴിവാക്കിക്കൊണ്ട്, പാകിസ്താൻ-യുഎസ് ബന്ധത്തിന്റെ യഥാർത്ഥ സാധ്യതകൾ തിരിച്ചറിയാനാണ് ശ്രമിക്കേണ്ടത് എന്നും ഷെഹബാസ് ഷെരീഫ് പറഞ്ഞു.
Comments