മലപ്പുറത്ത് പോലീസുകാരന് സസ്പെൻഷൻ. വിദ്യാർത്ഥിയെ മർദ്ദിച്ച സംഭവത്തിലാണ് പോലീസ് നടപടി. കോഴിക്കോട് മാവൂർ സ്റ്റേഷനിലെ ഡ്രൈവർ അബ്ദുൾ അസീസിനെയാണ് അന്വേഷണ വിധേയമായി സസ്പെൻഡ് ചെയ്തത്. മലപ്പുറം കിഴിശേരിയിലായിരുന്നു പ്ലസ് വൺ വിദ്യാർത്ഥിയെ പോലീസുകാർ മർദ്ദിച്ചത്. ഒക്ടോബർ 13നായിരുന്നു കേസിനാസ്പദമായ സംഭവം. രണ്ട് പോലീസുകാർ ചേർന്നായിരുന്നു വിദ്യാർത്ഥിയെ കയ്യേറ്റം ചെയ്തത്.
മഫ്തിയിലെത്തിയ പോലീസുകാരായിരുന്നു വിദ്യാർത്ഥിയെ മർദ്ദിച്ചത്. കുഴിമണ്ണ സ്കൂളിലെ പ്ലസ് വൺ വിദ്യാർത്ഥി സ്കൂൾ വിട്ട് വീട്ടിലേക്ക് പോകാനായി ബസ് സ്റ്റോപ്പിൽ നിൽക്കുമ്പോഴായിരുന്നു മർദ്ദനത്തിന് ഇരയായത്. സംഭവം നടന്ന ദിവസം സ്കൂളിൽ വിദ്യാർത്ഥികൾക്കിടയിൽ സംഘർഷം നടന്നിരുന്നു. എന്നാൽ സ്കൂളിൽ നടന്ന പ്രശ്നവുമായി യാതൊരു ബന്ധവുമില്ലാത്ത വിദ്യാർത്ഥിയെയാണ് പോലീസുകാരെത്തി മർദ്ദിച്ചത്. സംഭവത്തിൽ ജില്ലാ പോലീസ് മേധാവിയുടെ നിർദേശത്തിൽ അന്വേഷണം നടക്കുകയാണ്.
Comments