ടി20 ലോകകപ്പിൽ പാകിസ്താനെതിരെ മെൽബണിൽ നടന്ന മത്സരത്തിൽ ഇന്ത്യ ത്രസിപ്പിക്കുന്ന വിജയമാണ് നേടിയത്. ഭാരതീയർക്കും ക്രിക്കറ്റ് പ്രേമികൾക്കും അതിമധുരമുള്ള ഒരു ദീപാവലി സമ്മാനം ഇന്ത്യൻ ടീം നൽകിത്. നാല് വിക്കറ്റ് നഷ്ടത്തിൽ 31 റൺസ് എന്ന നിലയിൽ തകർന്നടിഞ്ഞ ഇന്ത്യയെയാണ് കോഹ്ലിയും ഹാർദിക് പാണ്ഡ്യയും ചേർന്ന് വിജയത്തിലേക്കെത്തിച്ചത്. 82 റൺസെടുത്ത വിരാട് കോഹ്ലിയുടെ ബാറ്റിംഗിനെ എത്ര പ്രശംസിച്ചാലും മതിയാവില്ല. പാകിസ്താനെ മുട്ടുക്കുത്തിച്ച ഇന്ത്യയുടെ വിജയം ആരാധകർ ആവേശമാക്കിയിരുന്നു. ഇതിലും വലിയ ദീപാവലി സമ്മാനം സ്വപ്നങ്ങളിൽ മാത്രമെന്ന് പലരും പ്രതികരിച്ചു. സാധാരണക്കാർ മുതൽ മന്ത്രിമാരും സെലിബ്രിറ്റികളുമടക്കം ഇന്ത്യയുടെ വിജയം സമൂഹമാദ്ധ്യമങ്ങളിൽ ആഘോഷിച്ചു. ഇപ്പോൾ സമൂഹമാദ്ധ്യമങ്ങളിൽ വൈറലാകുന്നതും ഒരു വിജയാഘോഷമാണ്. ഇന്ത്യയുടെ ഓപ്പണിംഗ് ബാറ്ററായ ശിഖർ ധവാൻ പാകിസ്താനെതിരെയുള്ള ഇന്ത്യയുടെ വിജയം നൃത്തം ചെയ്താണ് ആഘോഷിച്ചത്.
ഇന്ത്യയുടെ ഉജ്ജ്വല വിജയം ആഘോഷിക്കുന്ന വീഡിയോ തന്റെ ഇൻസ്റ്റഗ്രാമിലാണ് ശിഖർ ധവാൻ പങ്കിട്ടിരിക്കുന്നത്. തന്റെ ബാല്യകാല സുഹൃത്തായ സാഗർ ഗൈൻഡിനൊപ്പമാണ് നൃത്തം. കറുത്ത കുർത്തയും പൈജാമയും സൺഗ്ലാസും ധരിച്ചാണ് താരത്തിന്റെ നൃത്തം. ‘ഇന്ത്യ പാകിസ്താനെ തോൽപ്പിക്കുമ്പോൾ’ എന്ന് കുറിച്ചു കൊണ്ടാണ് വീഡിയോ പോസ്റ്റ് ചെയ്തിരിക്കുന്നത്. മനോഹരമായി നൃത്തം ചെയ്യുന്നതിനൊപ്പം തലയിൽ ഇരിക്കുന്ന സൺഗ്ലാസ് മുഖത്ത് വരുത്തുന്ന സ്റ്റെപ്പും താരം ഇടുന്നു. ധവാന്റെ നൃത്തം ഇതിനോടകം ഹിറ്റായി കഴിഞ്ഞു.
ഇൻസ്റ്റാഗ്രാമിൽ പങ്കുവെച്ച് മണിക്കൂറുകൾക്കുള്ളിൽ തന്നെ വീഡിയോയ്ക്ക് 2.4 ദശലക്ഷത്തിലധികം കാഴ്ചക്കാരെ ലഭിച്ചു. നിരവധി പേരാണ് വീഡിയോയ്ക്ക് പ്രതികരണം അറിയിക്കുന്നത്. അവസാന രണ്ട് ഓവറിൽ 33 റൺസ് വേണ്ടിയിരുന്ന ഇന്ത്യക്ക് 19-ാം ഓവറിന്റെ അവസാന പന്തുകൾ തുടരെ സിക്സറുകൾ പറത്തിയാണ് കോഹ്ലി ഇന്ത്യയ്ക്ക് വിജയ പ്രതീക്ഷ നൽകിയത്. 53 പന്തിൽ നാല് സിക്സറും ആറ് ഫോറും നേടിയാണ് കോലി 83 റൺസെടുത്തത്. 37 പന്തിൽ 40 റൺസെടുത്ത പാണ്ഡ്യയും കോഹ്ലിക്ക് പിന്തുണ നൽകി.
Comments