ലോകത്തിലെ ഏറ്റവും വലിയ ബഹിരാകാശ ഗവേഷണ ഏജൻസിയായ നാസ പുറത്തുവിട്ട സൂര്യന്റെ ചിത്രമാണ് ഇപ്പോൾ വൈറലാകുന്നത്. ചിരിക്കുന്ന സൂര്യനെന്ന വിശേഷണത്തോടെയായിരുന്നു നാസയുടെ സോളാർ ഡൈനാമിക്സ് ഒബ്സർവേറ്ററി വിഭാഗം ചിത്രം പുറത്തുവിട്ടത്.
”ഇന്ന് നാസയുടെ സോളാർ ഡൈനാമിക്സ് ഒബ്സർവേറ്ററിക്ക് ചിരിക്കുന്ന സൂര്യനെ ലഭിച്ചു. അൾട്രാവയലറ്റ് രശ്മികൾക്കിടയിൽ കാണപ്പെടുന്ന ഇരുണ്ടപാടുകൾ യഥാർത്ഥത്തിൽ കൊറോണൽ ഹോളുകൾ എന്നാണ് അറിയിപ്പെടുന്നത്. ബഹിരാകാശത്തേക്ക് അതിവേഗ സൗരക്കാറ്റ് വീശുന്ന പ്രദേശങ്ങളാണിത്” ഈ അടിക്കുറിപ്പോടെയായിരുന്നു ചിരിക്കുന്ന സൂര്യന്റെ ചിത്രം നാസ പങ്കുവെച്ചത്.
Say cheese! 📸
Today, NASA’s Solar Dynamics Observatory caught the Sun "smiling." Seen in ultraviolet light, these dark patches on the Sun are known as coronal holes and are regions where fast solar wind gushes out into space. pic.twitter.com/hVRXaN7Z31
— NASA Sun, Space & Scream 🎃 (@NASASun) October 26, 2022
പുഞ്ചിരിക്കുന്ന സൂര്യനെ പകർത്താൻ കഴിഞ്ഞതിനുള്ള കാരണവും നാസ വ്യക്തമാക്കിയിരുന്നു. പോസ്റ്റിൽ പരാമർശിച്ച കൊറോണൽ ഹോളുകൾ ആണ് സൂര്യൻ ചിരിക്കുന്നതായി തോന്നാൻ കാരണം. യാദൃശ്ചികമായി അവ വന്നുപെട്ടത് ചിരിക്കുന്ന ഒരു രൂപത്തിലായെന്ന് മാത്രം. ഇത്തരം കൊറോണൽ ഹോളുകൾക്ക് ഭൂമിയെയും സ്വാധീനിക്കാൻ കഴിയുമെന്നാണ് പറയപ്പെടുന്നത്. ഈ ഹോളുകൾക്ക് കാന്തിക ശക്തിയുള്ളതിനാലും സൗരക്കാറ്റ് പുറപ്പെടുവിക്കുന്ന മേഖലയായതിനാലുമാണ് ഭൂമിയെയും ഇവ സ്വാധീനിക്കുമെന്ന് പറയുന്നത്. സൂര്യനിൽ അങ്ങിങ്ങായി രൂപപ്പെട്ട കൊറോണൽ ഹോളുകൾക്ക് സ്മൈലിയുടെ രൂപമായതോടെ ചിരിക്കുന്ന സൂര്യബിംബത്തെ ലഭിക്കുകയായിരുന്നു.
ചിത്രം വൈറലായതോടെ മറ്റ് വസ്തുക്കളോട് താരതമ്യം ചെയ്താണ് സൈബർ ലോകം ഇതിനെ വരവേറ്റത്. ഹാളോവീനായും ചിരിക്കുന്ന മുഖമുള്ള സൺ ബിസ്കറ്റായും സിംഹമായുമെല്ലാം ഈ ചിത്രത്തെ ആളുകൾ പരിഷ്കരിച്ചുകൊണ്ട് പുറത്തിറക്കി. കത്തുന്ന ചൂടിലും ചിരിക്കാൻ കഴിയുന്ന സൂര്യനാണ് എന്റെ ഹീറോയെന്നും ചിലർ പ്രതികരിച്ചു.
