ന്യൂഡൽഹി: സജീവ രാഷ്‌ട്രീയത്തിലേക്ക് കടക്കാനുള്ള ബോളിവുഡ് നടി കങ്കണ റണാവത്തിനെ സ്വാഗതം ചെയ്ത് ബിജെപി ദേശീയ അദ്ധ്യക്ഷൻ ജെപി നദ്ദ. കങ്കണയെ ബിജെപിയിലേക്ക് സ്വാഗതം ചെയ്യുന്നുവെന്നും എന്നാൽ തിരഞ്ഞെടുപ്പിൽ മത്സരിക്കുന്നത് സംബന്ധിച്ച് കൂടിയാലോചനകൾക്ക് ശേഷമാണ് തീരുമാനിക്കുകയെന്നും ജെപി നദ്ദ പറഞ്ഞു.
‘കങ്കണ റണാവത്ത് പാർട്ടിയിൽ ചേരുന്നത് സ്വാഗതം ചെയ്യുന്നു. പാർട്ടിയുമായി ചേർന്ന് പ്രവർത്തിക്കാൻ ആഗ്രഹിക്കുന്ന ഏതൊരാൾക്കും വിശാലമായ ഇടമുണ്ട്. എന്നാൽ തിരഞ്ഞെടുപ്പിൽ മത്സരിക്കുന്നത് എന്റെ മാത്രം തീരുമാനമല്ല. താഴെത്തട്ടിൽ നിന്ന് ഒരു കൂടിയാലോചന പ്രക്രിയയുണ്ട്. തിരഞ്ഞെടുപ്പ് കമ്മറ്റി മുതൽ പാർലമെന്ററി ബോർഡ് വരെയെന്നായിരുന്നു ജെപി നദ്ദയുടെ പ്രതികരണം.
എല്ലാവരേയും ബിജെപിയിലേക്ക് സ്വാഗതം ചെയ്യുന്നു. എന്നാൽ ഏത് പദവിയിലാണ് അവരെയെല്ലാം ഉൾപ്പെടുത്തേണ്ടതെന്ന് പാർട്ടിയാണ് തീരുമാനിക്കുന്നത്. ഞങ്ങൾ ആരെയും ഉപാധികളാൽ എടുക്കില്ല. ഞങ്ങൾ എല്ലാവരോടും പറയുന്നു, നിങ്ങൾ നിരുപാധികമായി വരണം, അതിനുശേഷം മാത്രമേ പാർട്ടി തീരുമാനിക്കൂയെന്നും അദ്ദേഹം കൂട്ടിച്ചേർത്തു.
കഴിഞ്ഞ ദിവസം ഒരു ദേശീയ മാദ്ധ്യമത്തിന് നൽകിയ അഭിമുഖത്തിലാണ് സജീവ രാഷ്‌ട്രീയത്തിലേക്ക് കടക്കാനുള്ള സാധ്യതയെപ്പറ്റി കങ്കണ തുറന്നു സംസാരിച്ചത്.
ഹിമാചൽ പ്രദേശിലെ മണ്ഡിയിൽ നിന്നും അടുത്ത ലോക്സഭാ തിരഞ്ഞെടുപ്പിൽ മത്സരിക്കാൻ തയ്യാറാണ്. ബിജെപി തനിക്ക് അവസരം നൽകുകയാണെങ്കിൽ ജനങ്ങൾക്ക് വേണ്ടി താൻ തിരഞ്ഞെടുപ്പിൽ മത്സരിക്കും. സമൂഹത്തിന്റെ എല്ലാ തലത്തിൽ നിന്നുകൊണ്ടും പ്രവർത്തിക്കാൻ തനിക്ക് സാധിക്കും. സേവിക്കാൻ ഹിമാചൽ പ്രദേശിലെ ജനങ്ങൾ തനിക്ക് ഒരു അവസരം നൽകുകയാണെങ്കിൽ ..തീർച്ചയായും അത് സ്വീകരിക്കുമെന്നും കങ്കണ വ്യക്തമാക്കിയിരുന്നു.
