ന്യൂഡൽഹി: അനധികൃതമായി കടത്താൻ ശ്രമിച്ച 2.95 കോടി രൂപ വിലമതിക്കുന്ന സ്വർണ്ണം പിടിച്ചെടുത്ത് കസ്റ്റംസ് ഉദ്യോഗസ്ഥർ. ബോഡി ഷെയ്പ്പറുകൾക്ക് ഉള്ളിൽ ഉളിപ്പിച്ച് സ്വർണ്ണം കടത്താനായിരുന്നു ശ്രമം. സംഭവവുമായി ബന്ധപ്പെട്ട് മൂന്ന് യാത്രക്കാരെ അറസ്റ്റ് ചെയ്തതായി കസ്റ്റംസ് പുറത്ത് വിട്ട ഔദ്യോഗിക പ്രസ്താവനയിൽ പറയുന്നു.
കഴിഞ്ഞ ദിവസം ദിവസം ഷാർജയിൽ നിന്ന് ഡൽഹി അന്താരാഷ്ട്ര വിമാനത്താവളത്തിലിറങ്ങിയവരിൽ നിന്നാണ് സ്വർണ്ണം പിടിച്ചെടുത്തത്. യാത്രക്കാരുടെ ബാഗുകൾ പരിശോധിച്ചപ്പോഴാണ് ബോഡി ഷെയ്പ്പർ ബെൽറ്റുകളുടെ ഉള്ളിൽ ഒളിപ്പിച്ച നിലയിൽ സ്വർണ്ണം കണ്ടെത്തിയത്. 7.76 കിലോ തൂക്കം വരുന്ന സ്വർണ്ണമാണ് ബെൽറ്റുകൾക്കുള്ളിൽ ഒളിപ്പിച്ചിരുന്നത്. ചതുരാകൃതിയിലുള്ള ഏഴ് പൗച്ചുകളാക്കിയാണ് സ്വർണ്ണം സൂക്ഷിച്ചിരുന്നത്.
പിടിച്ചെടുത്ത സ്വർണ്ണത്തിന് 2.95 കോടി രൂപ വില വരുമെന്നും അധികൃതർ വ്യക്തമാക്കി. അതേസമയം പ്രതികളെ കുറിച്ചുള്ള കൂടുതൽ വിവരങ്ങൾ പുറത്ത് വിട്ടിട്ടില്ല. സംഭവത്തിൽ അന്വേഷണം പുരോഗമിക്കുകയാണെന്നും കസ്റ്റംസ് അധികൃതർ വ്യക്തമാക്കി.
