രാത്രിയിൽ ആകാശത്ത് തെളിയുന്ന ചന്ദ്രൻ എന്നും ഒരു കൗതുകമാണ്. ഇരുൾ നിറഞ്ഞ ആകാശത്തിൽ വെളിച്ചത്തിന്റെ കണികകൾ പാകി ഭൂമിയിലേക്ക് കണ്ണും നട്ടിരിപ്പാണ് ചന്ദ്രന്റെ പരിപാടി. ചന്ദ്രനുമായി ബന്ധപ്പെട്ട് പല ഗവേഷണങ്ങൾ ഇന്നും നടക്കുന്നുണ്ട്. ഇപ്പോഴിതാ വളരുന്ന ചന്ദ്രക്കലയുടെ അതിമനോഹരമായ ഒരു ചിത്രം പുറത്തുവിട്ടിരിക്കുകയാണ് നാസയുടെ അന്താരാഷ്ട്ര ബഹിരാകാശ നിലയം. 2022 സെപ്റ്റംബർ 30 ന് പകർത്തിയ ചിത്രമാണ് ഇപ്പോൾ പുറത്ത് വന്നിരിക്കുന്നത്.
ദക്ഷിണാഫ്രിക്കയുടെ തെക്കുപടിഞ്ഞാറ് അറ്റ്ലാന്റിക് സമുദ്രത്തിന് മുകളിൽ 267 മൈൽ ഭ്രമണപഥത്തിൽ സൂര്യോദയ സമയത്ത് ഭ്രമണം ചെയ്യവേയാണ് ഈ ചിത്രം എടുത്തിരിക്കുന്നത്. നാഷണൽ എയറോനോട്ടിക്സ് ആൻഡ് സ്പേസ് അഡ്മിനിസ്ട്രേഷനാണ് ഇക്കാര്യം അറിയിച്ചത്. ഭൂമിയിലെ ഈ കാഴ്ച വർണ്ണാഭമായ അന്തരീക്ഷത്തിന്റെ പാളികളിലേക്ക് നമ്മുടെ കണ്ണുകളെ കൊണ്ട് എത്തിക്കുന്നു എന്ന് നാസ വിശദീകരിക്കുന്നു.
ഇത് ആദ്യമായി അല്ല നാസ ഇത്തരത്തിലുള്ള ചിത്രങ്ങൾ പുറത്ത് വിടുന്നത്. കഴിഞ്ഞ മാസമാണ് നക്ഷത്രാലംകൃതമായ പില്ലേഴ്സ് ഓഫ് ക്രിയേഷന്റെ പുതിയ ചിത്രങ്ങൾ നാസ പുറത്ത് വിട്ടത്. ചിത്രം കണ്ട് ശാസ്ത്ര ലോകം തന്നെ അതിശയിച്ചിരുന്നു.ഭൂമിയിൽ നിന്ന് 6500 പ്രകാശവർഷം അകലെയുള്ള ഈഗിൾ നെബുലയുടെ കുഞ്ഞൻ ഭാഗം മാത്രമാണ് തിളങ്ങുന്ന മഞ്ഞുകണങ്ങൾ കൊണ്ട് അലങ്കരിച്ചത് പോലെ കാണുന്ന ക്രിയേഷൻ ഓഫ് പില്ലേഴ്സ്. നാസയുടെ ഹബിൾ ആദ്യമായി ഈ ചിത്രങ്ങളെ പകർത്തിയത് 2005 ലാണ് . 2014 ൽ ഇവ വീണ്ടും ഹബിളിന്റെ ക്യാമറയിൽ പതിഞ്ഞു. ഇത്തവണത്തെ ചിത്രം കൂടുതൽ വ്യക്തമാണ്
പുതിയതായി രൂപമെടുത്ത നക്ഷത്രങ്ങളാണ് ഇത്തവണത്തെ ഈ ചിത്രത്തിന്റെ പ്രധാന ആകർഷണം. വാതകങ്ങളും പൊടിപടലങ്ങളും നിറഞ്ഞ തൂണുകൾക്കുള്ളിൽ മതിയായ പിണ്ഡത്തിലുള്ള കെട്ടുകൾ രൂപമെടുക്കുകയും ഇത് ഗുരുത്വബലം നഷ്ടപ്പെട്ട് സാവധാനത്തിൽ ചൂട് പിടിച്ച് പുതിയ നക്ഷത്രങ്ങളുടെ പിറവിയിലേക്ക് എത്തുന്നുവെന്നാണ് ശാസ്ത്രലോകം പറയുന്നത്.
