കാശി വിശ്വനാഥനെ കണ്ടുവണങ്ങി നടൻ വിശാൽ; നവീകരണങ്ങൾക്ക് പ്രധാനമന്ത്രിയെ പ്രകീർത്തിച്ചും നന്ദിയറിയിച്ചും നടൻ; പ്രതികരണവുമായി മോദിയും

ന്യൂഡൽഹി: കാശി വിശ്വനാഥക്ഷേത്രം സന്ദർശിച്ചപ്പോഴുണ്ടായ ധന്യമായ അനുഭവം പങ്കുവെച്ച് കോളിവുഡ് നടൻ വിശാൽ. ക്ഷേത്രത്തിനും ക്ഷേത്രപരിസരത്തിനും വരുത്തിയ പരിവർത്തനങ്ങൾക്കും മാറ്റങ്ങൾക്കും പ്രധാനമന്ത്രി നരേന്ദ്രമോദിക്ക് നന്ദിയുണ്ടെന്നും നടൻ ട്വിറ്ററിലൂടെ അറിയിച്ചു.

കാശിയിൽ വെച്ച് വളരെ നല്ല അനുഭവമാണ് നിങ്ങൾക്കുണ്ടായത് എന്നതിൽ അത്യധികം സന്തോഷമുണ്ടെന്ന് പ്രധാനമന്ത്രി നരേന്ദ്രമോദി വിശാലിന് മറുപടി നൽകി. ട്വിറ്ററിലൂടെയായിരുന്നു നടന്റെ നല്ല വാക്കുകൾക്ക് പ്രധാനമന്ത്രി പ്രതികരണമറിയിച്ചത്.

”പ്രിയപ്പെട്ട മോദിജി, ഞാൻ കാശി സന്ദർശിക്കാനിടയായി. അവിടുത്തെ പൂജയിൽ പങ്കെടുക്കുകയും കാശി വിശ്വനാഥനെ ദർശിക്കാൻ സാധിക്കുകയും ചെയ്തു. പുണ്യഗംഗയെ സ്പർശിക്കാൻ കഴിഞ്ഞു. മികച്ച നവീകരണങ്ങളുമായി കാശി ഇന്ന് കൂടുതൽ മനോഹരമായിരിക്കുന്നു.  ഈ പരിവർത്തനങ്ങൾക്ക് നേതൃത്വം നൽകിയ അങ്ങയെ ഈശ്വരൻ അനുഗ്രഹിക്കട്ടെ! ഏതൊരാൾക്കും ദർശിക്കാൻ സാധിക്കുന്ന വിധം ഇന്ന് കാശി മാറിക്കഴിഞ്ഞു. ഹാറ്റ്‌സ് ഓഫ്, സല്യൂട്ട് യൂ.. ”

ഇതായിരുന്നു നടൻ വിശാൽ ട്വിറ്ററിൽ കുറിച്ചത്. ഒക്ടോബർ 31നായിരുന്നു ഇക്കാര്യം പോസ്റ്റ് ചെയ്തത്. തുടർന്ന് നടന്റെ നല്ല വാക്കുകൾ നൽകിയ സന്തോഷത്തെക്കുറിച്ച് പ്രധാനമന്ത്രിയും കുറിപ്പ് പങ്കുവെക്കുകയയായിരുന്നു.

Glad that you had a wonderful experience in Kashi. https://t.co/e74hLfeMj1

— Narendra Modi (@narendramodi) November 2, 2022

ഇന്ത്യയിലെ ഏറ്റവും പ്രശസ്തമായ ശിവക്ഷേത്രമാണ് യുപിയിലെ വാരാണസിയിൽ സ്ഥിതിചെയ്യുന്ന കാശി വിശ്വനാഥ ക്ഷേത്രം. ഏതാനും മാസങ്ങൾക്ക് മുമ്പായിരുന്നു പ്രധാനമന്ത്രി നരേന്ദ്രമോദി ക്ഷേത്ര ഇടനാഴിയുടെ ഉദ്ഘാടനം നിർവഹിച്ചത്. തുടർന്ന് വിശ്വാസികളുടെയും വിനോദ സഞ്ചാരികളുടെയും എണ്ണത്തിൽ വൻ വർധനവുണ്ടായെന്ന് ഉത്തർപ്രദേശ് മുഖ്യമന്ത്രി യോഗി ആദിത്യനാഥ് അറിയിച്ചിരുന്നു. രാജ്യത്തിന്റെ മാത്രമല്ല, ലോകമെമ്പാടുമുള്ള തീർത്ഥാടകരുടെ കണ്ണുകൾ കാശിയിലേക്കാണെന്നും അദ്ദേഹം പരാമർശിച്ചിരുന്നു.