നടി ഹന്സിക വിവാഹിതയാകുന്നു എന്ന വാർത്ത ആരാധകർ ഇരു കൈയ്യും നീട്ടിയാണ് സ്വീകരിച്ചത്. ഇപ്പോൾ വരൻ ആരെന്ന് വെളിപ്പെടുത്തിയിരിക്കുകയാണ് താരം. മുംബൈയിലെ വ്യവസായിയും ഹന്സികയുടെ ബിസിനസ് പങ്കാളിയുമായ സുഹൈല് കതൂരിയയാണ് വരന്. പാരിസിലെ ഈഫല് ഗോപുരത്തിന്റെ മുന്നിൽ വച്ച് സുഹൈല് ഹന്സികയോട് വിവാഹാഭ്യര്ത്ഥന നടത്തുന്ന ചിത്രവും നടി പങ്കുവച്ചു.
ഹന്സികയും സുഹൈലും രണ്ടു വര്ഷമായി ഒരു ഇവന്റ് മാനേജ്മെന്റ് കമ്പനി നടത്തി വരികയാണ്. ഈ പരിചയമാണ് ഇരുവരെയും വിവാഹത്തിലെത്തിച്ചത്. ഈ വര്ഷം ഡിസംബറില് ജയ്പുരില് വച്ചാണ് വിവാഹം നടക്കുക. ജയ്പുരിലെ 450 വര്ഷം പഴക്കമുള്ള കൊട്ടാരമാണ് താരസുന്ദരിയുടെ വിവാഹത്തിന് വേദിയാകുന്നത്.
തികച്ചും രാജകീയമായി തന്നെയായിരിക്കും വിവാഹം നടക്കുക. തെലുങ്ക് ചിത്രമായ ദേശമുദുരു എന്ന ചിത്രത്തിലൂടെയാണ് ഹന്സിക സിനിമാ മേഖലയിലേയ്ക്ക് കടന്നു വരുന്നത്. ശേഷം ഹിന്ദി സിനിമകളിൽ സജീവമായി. ഹിമേഷ് രേഷാമിയ നായകനായി എത്തിയ ആപ്ക സുരൂര് എന്ന ചിത്രത്തിലൂടെ താരം പ്രേക്ഷക ശ്രദ്ധ നേടുന്നത്. കന്നഡയിലും തമിഴിലും മലയാളത്തിലും വേഷമിട്ടു. മോഹൻലാലിനെ നായകനാക്കി ബി.ഉണ്ണികൃഷ്ണൻ സംവിധാനം ചെയ്ത വില്ലനിലൂടെയാണ് ഹൻസിക മലയാള സിനിമയിൽ സാന്നിധ്യമറിയിച്ചത്.
