വിവാഹവും ഹൃദയത്തിന്റെ ആരോഗ്യവും തമ്മിൽ ബന്ധമുണ്ടോ?. ഈ ചോദ്യം കേട്ടാൽ ഏവരും ഒന്ന് ഞെട്ടും. എന്നാൽ ഞെട്ടേണ്ട നമ്മുടെ വിവാഹ ജീവിതവും ഹൃദയത്തിന്റെ ആരോഗ്യവും തമ്മിൽ ബന്ധമുണ്ടെന്നാണ് പഠനങ്ങൾ പറയുന്നത്. സംഘർഷ ഭരിതമായ വിവാഹ ജീവിതവും ദാമ്പത്യ ബന്ധവും ഹൃദയാഘാത സാദ്ധ്യത വർദ്ധിപ്പിക്കും.
സംഘർഷ ഭരിതമായ വിവാഹ ജീവിതം നയിക്കുന്നവരിൽ ഹൃദ്രോഗ സാദ്ധ്യത മറ്റുള്ളവരെ അപേക്ഷിച്ച് കൂടുതലാണെന്നാണ് പഠനങ്ങൾ പറയുന്നത്. ന്യൂ ഹവേനിലെ ഗവേഷകനായ സെൻജിങ് സൂ ആണ് ഇതുമായി ബന്ധപ്പെട്ട പഠനം നടത്തിയത്. 55 വയസ്സിൽ താഴെയുള്ള ഹൃദയാഘാതം വന്ന ആളുകളിലായിരുന്നു പഠനം. 18 നും 55 നും ഇടയിൽ പ്രായമുള്ള 1593 പേരെ അദ്ദേഹം ഇതിനായി തിരഞ്ഞെടുത്തു. 30 സ്ഥലങ്ങളിലെ 103 ആശുപത്രികളിലായി ചികിത്സ തേടിയവർ ആയിരുന്നു ഇവർ.
ഹൃദയാഘാതം ഉണ്ടാകുമ്പോൾ ഇവർ വിവാഹിതരോ, പങ്കാളിയുള്ളവരോ ആണ്. ഹൃദയാഘാതം തരണം ചെയ്ത ഇവർക്ക് ‘സ്‌റ്റോക്‌ഹോം മാരിറ്റൽ സ്‌ട്രെസ് സ്‌കേൽ’ എന്ന പേരിൽ ഒരു ചോദ്യാവലി നൽകി. വിവാഹ ജീവിതത്തിൽ അനുഭവിക്കുന്ന സമ്മർദ്ദത്തിന്റെ തോത് പരിശോധിക്കുകയായിരുന്നു ഈ ചോദ്യാവലിയുടെ ലക്ഷ്യം.ചോദ്യാവലിക്ക് ഉത്തരം നൽകിയ ഭൂരിഭാഗം പേരും തങ്ങൾ വലിയ തോതിലുള്ള സമ്മർദ്ദം അനുഭവിക്കുന്നവരാണെന്ന് വ്യക്തമാക്കി. ഇതോടെയാണ് സംഘർഷ ഭരിതമായ വിവാഹ ബന്ധം ഹൃദയാഘാതത്തിലേക്ക് നയിക്കുമെന്ന നിഗമനത്തിൽ അദ്ദേഹം എത്തിയത്. ഹൃദയാഘാതം ഉണ്ടായവരിൽ ഈ അവസ്ഥ ഏറെ ഗുരുതരമാണെന്നും അവർക്ക് വീണ്ടും ഹൃദയാഘാതത്തിനുളള സാദ്ധ്യത വർദ്ധിപ്പിക്കുന്നുവെന്നും പഠനം പറയുന്നു. ഇക്കാരണത്താലാണ് ഹൃദയാഘാതം വന്ന 50 ശതമാനം പേരും ചികിത്സ തേടുന്നത് എന്നും പഠനം വ്യക്തമാക്കുന്നുണ്ട്.
സംഘർഷ ഭരിതമായ വിവാഹ ജീവിതത്തിന് പുറമേ ജോലി ഭാരവും മറ്റ് സാമ്പത്തിക പ്രശ്നങ്ങളും ഹൃദയാഘാതത്തിന് കാരണമാകുന്നു. പഠനത്തിലെ കൂടുതൽ വിവരങ്ങൾ ഈ മാസം അഞ്ച് മുതൽ ഏഴ് വരെ ചിക്കാഗോയിൽ നടക്കുന്ന അമേരിക്കൻ ഹാർട്ട് അസോസിയേഷൻ സൈന്റിഫിക് സെഷൻസ് 2022 ൽ ഴൂ അവതരിപ്പിക്കുമെന്നാണ് റിപ്പോർട്ടുകൾ.
Comments