മലയാളികൾക്ക് അത്ര താൽപ്പര്യമില്ലാത്ത പച്ചക്കറിയാണെങ്കിലും കേരളത്തിലെ കാലാവസ്ഥയിൽ നന്നായി വളരുന്ന ഒരു പച്ചക്കറിയാണ് വെണ്ടയ്ക്ക.ഫെബ്രുവരി-മാർച്ച്, ജൂൺ-ജുലൈ, ഒക്ടോബർ-നവംബർ എന്നിവ നടീൽ സമയം. എപ്പോഴും വിളവ് തരുന്ന പച്ചക്കറി എന്നത് മാത്രമല്ല ഇതിന്റെ പ്രത്യേകത.പോഷകങ്ങളുടെ കലവറയായ വെണ്ടയ്ക്ക നിരവധി രോഗങ്ങളെയാണ് പ്രതിരോധിക്കുന്നത്.
എന്തൊക്കെയാണ് വെണ്ടക്കയുടെ ഗുണങ്ങൾ എന്നു നോക്കാം. മിനറലുകൾ,വിറ്റാമിൻ എ,ആന്റിഓക്‌സിഡന്റുകളായ ബീറ്റ കരോട്ടിൻ,ലുട്ടെയിൻ എന്നിവ അടങ്ങിയിട്ടുള്ളതാണ് വെണ്ടയ്ക്ക.ഇത് കഴിക്കുന്നത് കാഴ്ചശക്തി കുറയുന്നതും തിമിരം തടയാനും റെറ്റിനയുടെ തകരാറുകൾ തടയാനും സഹായിക്കും.വിറ്റാമിൻ എയും ആന്റിഓക്‌സിഡന്റുകളും ചർമ്മത്തിന്റെ ആരോഗ്യത്തിന് ഫലപ്രദമാണ്. മുഖക്കുരു, ചർമ്മത്തിലെ പാടുകൾ എന്നിവ മാറാനും ചുളിവുകളില്ലാതാക്കാനും സഹായിക്കുന്നു.താരൻ, മുടിയുടെ വരൾച്ച, മുടികൊഴിച്ചിൽ എന്നിവ കുറയും.
ആഹാരത്തിലെ ഫൈബറിന്റെ അളവ് വർദ്ധിപ്പിക്കാൻ സഹായിക്കുന്ന വെണ്ടയ്‌ക്ക് ദഹനേന്ദ്രിയത്തിന് പ്രിയപ്പെട്ടതാണ്. മലവിസർജ്ജനം സാധാരണഗതിയിലാക്കുകയും ഉദരസംബന്ധമായ പ്രശ്‌നങ്ങൾക്ക് പരിഹാരം നൽകുകയും ചെയ്യുന്നു.വെണ്ടയ്‌ക്കയിൽ ധാരാളം പൊട്ടാസ്യം അടങ്ങിയിരിക്കുന്നു. പൊട്ടാസ്യം ശരീരത്തിലെ ജലത്തിന്റെ അളവ് നിയന്ത്രിക്കും. രക്തക്കുഴലുകളെയും ധമനികളെയും റിലാക്‌സ് ചെയ്യാൻ സഹായിക്കുന്ന പൊട്ടാസ്യം ഹൃദയത്തിനും ആശ്വാസം നൽകും
അധികം മൂക്കാത്ത വെണ്ടയ്ക്ക ദിവസവും രാവിലെ തിന്നാൽ ശരീരത്തെ പോഷിപ്പിക്കും. മൂപ്പില്ലാത്ത വെണ്ടയ്ക്ക വേവിച്ച് അതിന്റെ ആവികൊണ്ടാൽ ചുമയ്‌ക്കും ഒച്ചയടപ്പിനും ജലദോഷത്തിനും ഫലം ചെയ്യും.അതിസാരത്തിന് വെണ്ടയ്ക്ക സൂപ്പുവെച്ച് ഉപയോഗിക്കുന്നത് നല്ലതാണ്.
വെണ്ടയുടെ ഇലയും കായും ചതച്ച് നീരുള്ള ഭാഗത്ത് പുരട്ടിയാൽ നല്ല ഫലം ഉണ്ടാവും.വെണ്ടയുടെ വേര് ഉണക്കിപ്പൊടിച്ചത് ഒരു ടേബിൾ സ്പൂൺ എടുത്ത് അതിൽ ഓരോ ടീസ്പൂൺ തേനും നെയ്യും ചേർത്ത് രാത്രി കഴിച്ച് അതിന് ശേഷം ശുദ്ധമായ പാൽ കഴിച്ചാൽ ശരീരത്തിന് ധാതുപുഷ്ടിയുണ്ടാകുന്നു. വെണ്ടയ്ക്ക പ്രമേഹത്തെ ചെറുക്കാൻ വളരെ നല്ലതാണ്.തലേ ദിവസം വെണ്ടയ്ക്ക അരിഞ്ഞു ഒരു ഗ്ലാസ് വെള്ളത്തിൽ ഇട്ടുവെയ്‌ക്കുകയും പിറ്റേന്ന് കാലത്ത് ആ വെള്ളം വെറും വയറ്റിൽ കുടിക്കുകയും ചെയ്യുന്നത് പ്രമേഹത്തെ നിയന്ത്രിക്കാൻ സഹായിക്കുമത്രേ.
ഗർഭിണികൾക്ക് ഗുണകരമാണ് വെണ്ടയ്ക്ക.ഗർഭാവസ്ഥയിലുള്ള കുഞ്ഞുങ്ങൾക്ക് തലച്ചോറിന്റെ വികാസത്തിനും ന്യൂറൽ ട്യൂബിനെ തകരാറിൽ നിന്നു രക്ഷിക്കുന്നതിനും ഫോളിക്കാസിഡ് ആവശ്യമാണ്. വെണ്ടയ്‌ക്കയിൽ ഫോളേറ്റുകൾ ധാരാളമുണ്ട്. 4-12 ആഴ്ചകളിലെ ഗർഭകാലത്താണ് ഫോളിക്കാസിഡ് വേണ്ടിവരുന്നത്. വെണ്ടയ്‌ക്കയിലുളള ഇരുമ്പും ഫോളേറ്റും ഹീമോഗ്ലോബിന്റെ നിർമാണം ത്വരിതപ്പെടുത്തുന്നു.ഗർഭകാലത്തെ വിളർച്ച തടയുന്നതിനും അതു സഹായകം. അതിനാൽ ഗർഭിണികളുടെ ഭക്ഷണക്രമത്തിൽ വെണ്ടയ്ക്ക പതിവായി ഉൾപ്പെടുത്തണം.
എന്നാൽ ഏതൊരു ഭക്ഷണസാധനവും കഴിക്കുന്നത് പോലെ തന്നെയാണ് വെണ്ടയ്‌ക്കയും അധികമായാൽ ആപത്താണ്.വെണ്ടയ്‌ക്കയിലുളള ഓക്സാലിക് ആസിഡ് വൃക്കയിൽ കല്ലുണ്ടാക്കുന്നതായി ചില പഠനങ്ങളിൽ തെളിഞ്ഞിട്ടുണ്ട്. അത് കൊണ്ട് മിതമായി ഉപയോഗിച്ച് ആരോഗ്യത്തെ സംരക്ഷിക്കാം.
