മാഞ്ചസ്റ്റർ യുണൈറ്റഡ് പാളയത്തിൽ അസ്വസ്ഥൻ; ക്രിസ്റ്റ്യാനോയെ റാഞ്ചാൻ പിഎസ്ജിയും ന്യൂകാസിലും ; റോണോ-മെസി കൂട്ടുകെട്ട് ജനുവരിയിൽ അറിയാം

ലണ്ടൻ: പോർച്ചുഗൽ കരുത്തൻ ഇനി എത്രനാൾ ഇംഗ്ലീഷ് മണ്ണിലുണ്ടാകുമെന്നതിൽ ലോകകപ്പ് കഴിയും മുന്നേ തീരുമാനമാകുമെന്ന് സൂചന. ഫ്രഞ്ച് ലീഗിലേയ്‌ക്ക കൂടുമാറിയാൽ മെസ്സി ക്കൊപ്പം റൊണാൾഡോ പിഎസ്ജിയിൽ കളിക്കും. ഇതിനിടെ മാഞ്ചസ്റ്റർ സിറ്റി താരത്തെ ലഭിക്കാൻ ശ്രമിക്കുന്നുവെന്ന സൂചനയും വരുന്നുണ്ട്.

മാഞ്ചസ്റ്റർ യുണൈറ്റഡിൽ താൻ തീർത്തും നിരാശനെന്ന് തുറന്നുപറഞ്ഞാണ് റൊണാൾഡോ അനിഷ്ടം വ്യക്തമാക്കിയത്. തങ്ങളുടെ പാളയത്തിലെത്തിക്കാൻ ഫ്രഞ്ച് ലീഗിലെ വമ്പന്മാരായ പിഎസ്ജിയും പ്രീമിയർ ലീഗിൽ നിന്ന് വിടാതിരിക്കാൻ ന്യൂകാസിലും വലവീശിയി രിക്കുകയാണ്.

കഴിഞ്ഞ ദിവസം പിയേഴ്‌സ് മോർഗനുമായുള്ള അഭിമുഖത്തിലാണ് പ്രീമിയർ ലീഗിൽ താൻ നിരാശനാണെന്ന് ക്രിസ്റ്റ്യാനോ തുറന്നടിച്ചത്. യുവന്റസിൽ നിന്ന് ഏറെ പ്രതീക്ഷയോടെ എത്തിയ റൊണാൾഡോ ചെങ്കുപ്പായത്തിൽ കളം നിറയാതെ പോയത് മാനസിക പൊരുത്തക്കേടുകൊണ്ടാണെന്നാണ് സൂചന. ക്ലബ്ബ് തന്നെ വഞ്ചിച്ചെന്ന പരാമർശത്തിൽ പ്രധാന പ്രതിയായി മാനേജർ എറിക് ടെൻ ഹാഗിനെയാണ് കുറ്റപ്പെടുത്തിയത്.

ക്ലബ്ബ് മാറ്റം ഉറപ്പിച്ചാൽ ജനുവരിയിൽ ക്രിസ്റ്റ്യാനോ തട്ടകം മാറും. പാരീസ് സെന്റ് ജെർമൈൻസ് എന്ന പിഎസ്ജി മെസ്സിയുടെ വരവോടെ കരുത്താർജ്ജിച്ചിരിക്കുകയാണ്. റൊണാൾഡോ കൂടി ടീമിലെത്തിയാൽ ഏറ്റവും ശക്തമായ മുന്നേറ്റ നിരയായി ഫ്രഞ്ച് ലീഗ് ചാമ്പ്യന്മാർ മാറുമെന്ന് ഉറപ്പാണ്.