ദോഹ: ഖത്തർ ലോകകപ്പിൽ ജയത്തോടെ അരങ്ങേറിയ ബ്രസീലിന് കനത്ത തിരിച്ചടി. സ്വിറ്റ്സർലൻഡിനെതിരായ അടുത്ത മത്സരത്തിൽ സൂപ്പർ താരം നെയ്മർ കളിക്കില്ല. കഴിഞ്ഞ ദിവസം സെർബിയക്കെതിരെ നടന്ന മത്സരത്തിനിടെ കാൽക്കുഴയ്‌ക്കേറ്റ പരിക്കാണ് നെയ്മർക്ക് വിനയായത്.
നവംബർ 28ന് സ്വിറ്റ്സർലൻഡിനെതിരെയാണ് ബ്രസീലിന്റെ അടുത്ത മത്സരം. ആദ്യ മത്സരത്തിൽ തകർപ്പൻ പ്രകടനം കാഴ്ചവെച്ച ബ്രസീൽ ഒത്തിണക്കത്തോടെയുള്ള വിന്നിംഗ് കോമ്പിനേഷൻ കണ്ടെത്തിയിരുന്നു. നെയ്മറുടെ പരിക്ക് ഇതിൽ കരിനിഴൽ വീഴ്‌ത്തുമോയെന്നാണ് ആരാധകരുടെ ആശങ്ക.
കരുത്തരായ സ്വിറ്റ്സർലൻഡിനെ പരാജയപ്പെടുത്തി പ്രീക്വാർട്ടർ ഉറപ്പിക്കാനുള്ള ബ്രസീലിന്റെ നീക്കത്തിനാണ് ഇതോടെ തിരിച്ചടി ഏറ്റിരിക്കുന്നത്. അതേസമയം റിച്ചാർലിസൺ ഫോമിലേക്കുയർന്നത് ബ്രസീലിന് ആശ്വാസം നൽകുന്നതാണ്. കഴിഞ്ഞ മത്സരത്തിൽ റിച്ചാർലിസൺ നേടിയ രണ്ട് തകർപ്പൻ ഗോളുകാളായിരുന്നു ബ്രസീലിന് വിജയം സമ്മാനിച്ചത്.
