ദോഹ: ലോകകപ്പ് ഗ്രൂപ്പ് എഫിലെ ആവേശകരമായ പോരാട്ടത്തിൽ കാനഡയെ ഒന്നിനെതിരെ രണ്ട് ഗോളുകൾക്ക് പരാജയപ്പെടുത്തി മൊറോക്കോ നോക്കൗട്ടിൽ കടന്നു. ഗ്രൂപ്പ് ചാമ്പ്യൻമാരായാണ് മൊറോക്കോയുടെ മുന്നേറ്റം. ഗ്രൂപ്പിലെ മറ്റൊരു മത്സരത്തിൽ ക്രൊയേഷ്യ ബെൽജിയത്തിനെ ഗോൾ രഹിത സമനിലയിൽ തളച്ചു. ഇതോടെ, ലോക റാങ്കിംഗിൽ രണ്ടാം സ്ഥാനക്കാരായ ബെൽജിയം, ലോകകപ്പിലെ ഒന്നാം റൗണ്ടിൽ പുറത്തായി.
മത്സരത്തിലെ നാലാം മിനിറ്റിൽ സിയെച്ചാണ് മൊറോക്കോയുടെ ആദ്യ ഗോൾ നേടിയത്. ഇരുപത്തി മൂന്നാം മിനിറ്റിൽ എൽ നെസിരി മൊറോക്കോയുടെ ലീഡ് ഉയർത്തി. ഹക്കീമി നൽകിയ പന്ത് രണ്ട് കനേഡിയൻ സെന്റർ ബാക്കുകളെ മറികടന്ന് പെനാൽറ്റി ബോക്സിലെത്തിച്ച നെസിരി, തകർപ്പൻ ഷോട്ടിലൂടെ ഗോൾ നേടുകയായിരുന്നു. നാൽപ്പതാം മിനിറ്റിൽ അഗ്യൂക്ബെയുടെ സെൽഫ് ഗോളാണ് കാനഡയുടെ ആശ്വാസത്തിനുള്ള വകയായത്.
ഇതോടെ, ക്രൊയേഷ്യയും മൊറോക്കോയും നോക്കൗട്ടിൽ കടന്നു. ബെൽജിയത്തിനൊപ്പം കാനഡയും ലോകകപ്പിൽ നിന്നും പുറത്തായി.
