കൈയ്യൂക്കുള്ളവൻ കാര്യക്കാരൻ എന്ന അർത്ഥത്തിൽ ഉപയോഗിക്കപ്പെടുന്ന ഒരു പ്രയോഗമാണ് മൈറ്റ് ഈസ് റൈറ്റ് (Might is Right). വ്യവസ്ഥാപിത നിയമങ്ങൾ പരാജയപ്പെടുമ്പോഴോ, ഭരണകൂടം നിയമ നിർവഹണത്തിൽ അലംഭാവം കാട്ടുമ്പോഴോ ആളുകൾ നിയമം കൈയ്യിലെടുക്കാറുണ്ട്. ഇത്തരം അരാജക സന്ദർഭങ്ങളിൽ മൈറ്റ് ഈസ് റൈറ്റ് ആയിരിക്കും നിയമം എന്നാണ് പൊതുവെ പറയപ്പെടാറ്.
മൈറ്റി ഫൈറ്റ് (Mighty Fight) എന്നാൽ ശക്തമായ പോരാട്ടം എന്നാണ് അർത്ഥം. ദ്വന്ദയുദ്ധങ്ങളെയും വാശിയേറിയ മല്ലയുദ്ധങ്ങളെയുമൊക്കെ പലപ്പോഴും മൈറ്റി ഫൈറ്റ് എന്ന് വിശേഷിപ്പിക്കാറുണ്ട്. വാശിയേറിയ പോരാട്ടം നടക്കുന്ന കായിക മത്സരങ്ങളിൽ, ആവേശം വർദ്ധിപ്പിക്കുന്നതിനായി വിവരണം നടത്തുന്നവർ മൈറ്റി ഫൈറ്റ് എന്ന് ഇടയ്ക്കിടെ പറയാറുണ്ട്. നിലനിൽപ്പ് അപകടത്തിലാകുന്ന സന്ദർഭങ്ങളിൽ, രാഷ്ട്രീയ ലാഭമുണ്ടാക്കി നേട്ടം കൊയ്യുന്നതിന് വേണ്ടി ധാർമ്മികതയില്ലാത്ത ചില മാദ്ധ്യമങ്ങൾ, കുട്ടനെയും മുട്ടനെയും തമ്മിലടിപ്പിച്ച് ചോര കുടിക്കാൻ തരാതരം ഈ പ്രയോഗം ചില സന്ദർഭങ്ങളിൽ ഉപയോഗിച്ച് പോരാറുണ്ട്. ഇതേ പേരിൽ ഒരു കമ്പ്യൂട്ടർ ഗെയിമും നിലവിലുണ്ട്.
ഹിന്ദു ഐക്യവേദി സംസ്ഥാന അദ്ധ്യക്ഷ കെപി ശശികല ടീച്ചർ നടത്തിയ ഒരു പ്രയോഗമാണ് ഇവ ഇപ്പോൾ ചർച്ചയാക്കിയത്. മൈറ്റ് ഈസ് റൈറ്റ് എന്ന ടീച്ചറുടെ പ്രയോഗത്തെ ചില മാദ്ധ്യമങ്ങൾ മൈറ്റി ഫൈറ്റ് എന്ന് വളച്ചൊടിച്ച് എഴുതുകയായിരുന്നു. മാദ്ധ്യമങ്ങളുടെ വളച്ചൊടിക്കൽ ശ്രദ്ധയിൽപെട്ടതോടെ സ്ക്രീൻഷോട്ട് സഹിതം ടീച്ചർ തന്നെ ഇത് പൊളിച്ചടുക്കി രംഗത്തെത്തുകയും ചെയ്തിരുന്നു.
ഈ പ്രയോഗങ്ങൾ തമ്മിലുള്ള വ്യത്യാസം അറിയണമെങ്കിൽ പ്രധാനമായും ഭാഷയും വ്യാകരണവും അരച്ചുകലക്കി കുടിക്കണമെന്നില്ല. അത്യാവശ്യം സാമാന്യ ബോധം മതിയാകും. ആരുടെ, എന്ത് പ്രസ്താവനയായാലും ദുരുപയോഗം ചെയ്തും ദുർവ്യാഖ്യാനം ചെയ്തും തൻകാര്യം കാണാൻ ആഗ്രഹിക്കുന്നവർക്ക് വ്യത്യാസം അറിഞ്ഞിരുന്നിട്ടും വലിയ കാര്യമില്ല എന്നാണ് ഭാഷാപണ്ഡിതരുടെയും മാദ്ധ്യമ നിരീക്ഷകരുടെയും അഭിപ്രായം.
Comments