മാളികപ്പുറത്തിന്റെ വിതരണാവകാശം ഏറ്റെടുത്ത് അല്ലു അർജ്ജുന്റെ ​ഗീത ആർട്സ്!

ഉണ്ണി മുകുന്ദൻ നായകനായ മാളികപ്പുറം കേരളത്തിലെങ്ങും ഹൗസ്ഫുൾ ഷോയുമായി പ്രദർശനം തുടരുകയാണ്. കേരളത്തിന് പുറത്തും ചിത്രം ഇതിനോടകം തന്നെ റിലീസ് ചെയ്തു കഴിഞ്ഞു. മലയാളത്തിന് പുറമെ തമിഴ്, ഹിന്ദി, തെലുങ്ക്, കന്നഡ ഭാഷകളിലാണ് ചിത്രം റിലീസ് ചെയ്തിരിക്കുന്നത്. ജനവരി 6-നാണ് ചിത്രം കേരളത്തിന് പുറത്ത് റിലീസ് ചെയ്തത്. ഇപ്പോഴിതാ, കേരളത്തിന് പുറത്ത് ചിത്രത്തിന്റെ ഡബ്ബഡ് വേർഷന്റെ വിതരണവകാശം നടൻ അല്ലു അർജ്ജുന്റെ നിർമ്മാണ കമ്പനി ഏറ്റെടുത്തിരിക്കുന്നു എന്ന വാർത്തയാണ് പുറത്തു വരുന്നത്. ജനുവരി 20 മുതൽ കേരളത്തിന്റെ പുറത്ത് മാളികപ്പുറം വിതരണം ചെയ്യുന്നത് ​ഗീതാ ആർട്സ് ആണ്. തിരക്കഥാകൃത്ത് അഭിലാഷ് പിള്ളയാണ് ഇക്കാര്യം ഫേയ്സ്ബുക്കിലൂടെ അറിയിച്ചിരിക്കുന്നത്.

2022 ഡിസംബർ 30-നാണ് ഉണ്ണി മുകുന്ദൻ നായകനായി എത്തിയ മാളികപ്പുറം റിലീസ് ചെയ്തത്. കല്യാണി എന്ന എട്ടു വയസ്സുകാരിയുടെയും അവളുടെ സൂപ്പർ ഹീറോ ആയ അയ്യപ്പന്റെയും കഥ പറയുന്ന ചിത്രം സംവിധാനം ചെയ്തിരിക്കുന്നത് നവാഗതനായ വിഷ്ണു ശശി ശങ്കറാണ്. അഭിലാഷ് പിള്ളയാണ് തിരക്കഥ ഒരുക്കിയിരിക്കുന്നത്. സൂപ്പർസ്റ്റാർ പദവിയിലേയ്‌ക്കുള്ള ഉണ്ണി മുകുന്ദന്റെ ചുവട് വയ്പ്പാണ് മാളികപ്പുറമെന്ന് ആരാധകരും സിനിമാ പ്രേമികളും വിശേഷിപ്പിക്കുന്നു.

മനോജ് കെ ജയൻ, സൈജു കുറുപ്പ്, രമേശ് പിഷാരടി, സമ്പത്ത് റാം, ആൽഫി പഞ്ഞിക്കാരൻ എന്നിവരും ചിത്രത്തിൽ പ്രധാന വേഷങ്ങളിൽ എത്തുന്നു. ഛായാഗ്രഹണം-വിഷ്ണുനാരായണൻ, എഡിറ്റിം​ഗ്-ഷമീർ മുഹമ്മദ്, സം​ഗീതം,പശ്ചാത്തല സം​ഗീതം- രഞ്ജിൻ രാജ്. ആന്റോ ജോസഫും വേണു കുന്നപ്പിള്ളിയും ചേർന്നാണ് ചിത്രം നിർമ്മിച്ചിരിക്കുന്നത്.