തിരുവനന്തപുരം: കർണാടകയിലേക്ക് സർവീസ് നടത്തുന്ന ബസുകൾ അവിടെ നിന്ന് ഡീസലടിക്കണമെന്ന നിർദേശവുമായി കെഎസ്ആർടിസി സിഎംഡി ബിജു പ്രഭാകരൻ. ഡീസൽ ലിറ്ററിന് ഏഴ് രൂപ കേരളത്തിനേക്കാൾ കുറവായതിനാലാണ് കർണാടകയിലേക്ക് സർവീസ് നടത്തുന്ന ബസുകൾക്ക് ഇത്തരത്തിൽ നിർദേശം നൽകിയിരിക്കുന്നത്. കർണാടകയിൽ 87.36 രൂപ വിലയുള്ള ഡീസലിന് കേരളത്തിൽ 95.66 രൂപയാണ് വില.
കർണാടകയിൽ നിന്ന് ഇന്ധനം വാങ്ങാൻ പ്രത്യേക ഫ്യൂവൽ കാർഡും കെഎസ്ആർടിസി നൽകിയിട്ടുണ്ട്. ഓയിൽ കമ്പനികൾ നൽകുന്ന ഈ കാർഡ് ഉപയോഗിച്ച് പമ്പുകളിൽ നിന്ന് ഇന്ധനം വാങ്ങാൻ കഴിയും. നേരത്തെ കർണാടകയിലേക്ക് സർവീസ് നടത്തിയിരുന്ന ബസുകൾ പാലക്കാട് കെഎസ്ആർടിസി ഡിപ്പോയിൽ നിന്നാണ് ഡീസലടിച്ചിരുന്നത്.
കർണാടകയിൽ നിന്ന് ഡീസലടിക്കാൻ തുടങ്ങിയതോടെ 17 ബസുകളിൽ ഡീസൽ ഇനത്തിൽ നിന്ന് 3.15 ലക്ഷം രൂപയാമ് മാസം തോറും കെഎസ്ആർടിസിക്ക് ലാഭിക്കാനായത്. മാനനന്തവാടി വഴി കർണാടകയിലേക്ക് പോകുന്ന 15 സ്വിഫ്റ്റ് ബസുകളും ബംഗളൂരുവിൽ നിന്ന് കേരളത്തിലേക്ക് സർവീസ് നടത്തുന്ന രണ്ട് ബസുകളുമാണ് കർണാടകയിൽ നിന്ന് ഡീസലടിക്കുന്നത്. പ്രതിദിനം 1,500 ലിറ്റർ ഡീസലാണ് കെഎസ്ആർടിസിയുടെ ഈ സർവീസുകൾ കർണാടകയിൽ നിന്ന് അടിക്കുന്നത്.
