സ്‌നേഹ സ്പർശത്തിന്റെ മറ്റൊരു പേരാണ് സുരേഷ് ഗോപി. ഒരു സൂപ്പർതാരത്തിന്റെ യാതൊരുവിധ തലക്കനങ്ങളുമില്ലാത്ത ഒരു നടനുണ്ടെങ്കിൽ മലയാളികൾക്ക് അത് സുരേഷ് ഗോപിയാണ്. രാഷ്‌ട്രീയത്തിൽ സജീവമാകുന്നതിനും വളരെ കാലങ്ങൾക്ക് മുമ്പ് തന്നെ ജനങ്ങളുടെ മനസ്സ് തൊട്ടറിഞ്ഞ നടനാണ് അദ്ദേഹം. ജനനായകൻ എന്ന വിശേഷണത്തിന് എന്തുകൊണ്ടും യോജിച്ച പേരാണ് സുരേഷ് ഗോപി എന്നത്. ഇപ്പോഴിതാ, തന്റെ വിവാഹ വാർഷികത്തോടനുബന്ധിച്ച് മലക്കപ്പാറയിലെ വനവാസികൾക്ക് ആശുപത്രിയിൽ പോകുന്നതിനടക്കമുള്ള അത്യാവശ്യ കാര്യങ്ങൾക്ക് ഉപയോഗിക്കാൻ സാധിക്കുന്ന ഫൈബർ ബോട്ട് സമ്മാനമായി നൽകിയിരിക്കുകയാണ് താരം. നടൻ ടിനി ടോമാണ് സുരേഷ് ഗോപിയുടെ സ്‌നേഹ സമ്മാനം മലക്കപ്പാറയിലെത്തി ജനങ്ങൾക്ക് സമ്മാനിച്ചത്. ഫേയ്സ്ബുക്ക് ലൈവിലൂടെയാണ് ഇക്കാര്യം ടിനി ടോം പങ്കുവെച്ചിരിക്കുന്നത്.
വനവാസി സമൂഹത്തിന്റെ ക്ഷേമത്തിനു വേണ്ടി സുരേഷ് ഗോപി നടത്തുന്ന പ്രവർത്തനങ്ങൽ ഏറെ ശ്രദ്ധിക്കപ്പെട്ടിരുന്നു. എംപി ആയിരിക്കെ കേരളത്തിലെ വനവാസികൾക്കായി രാജ്യസഭയിൽ ശബ്ദമുയർത്തിയ വ്യക്തിയാണ് അദ്ദേഹം. താൻ നേരിട്ട് സന്ദർശിച്ച് മനസിലാക്കിയ വസ്തുതകളാണ് സുരേഷ് ഗോപി രാജ്യസഭയിൽ ഉന്നയിച്ചത്. ഇടമലക്കുടിയിലേയും വയനാട്ടിലെ കുളത്തൂർ ഉൾപ്പെടെയുളള ഗോത്രമേഖലയിലെയും കോളനികളിൽ സന്ദർശനം നടത്തിയതും അവിടെ കണ്ടതുമായ യാഥാർത്ഥ്യങ്ങൾ അന്ന് സുരേഷ് ഗോപി സഭയിൽ നിരത്തി. എംപിയായിരിക്കെ വനവാസി സമൂഹത്തിന് വേണ്ടി അദ്ദേഹം ധാരാളം കാര്യങ്ങൾ ചെയ്തിരുന്നു. ഔദ്യോഗിക കാലാവധി കഴിഞ്ഞ ശേഷവും അദ്ദേഹം ആ പ്രവർത്തനങ്ങൾ തുടർന്നു വരികയാണ്.
കഴിഞ്ഞ ഏതാനും ദിവസങ്ങൾക്ക് മുമ്പാണ് വാഹന സൗകര്യങ്ങൾ ഇല്ലാത്ത ആതിരപ്പള്ളി വനവാസി ഊരുകളിൽ ആധുനിക സ്ട്രച്ചർ സുരേഷ് ഗോപി വാങ്ങി നൽകിയത്. അരകാപ്പ്, വീരൻകുടി, വെട്ടിവിട്ട കാട് ഊരുകളിലെ വനവാസികൾക്കാണ് താരം തണലായത്. മതിയായ റോഡ് സൗകര്യങ്ങൾ ഇല്ലാത്ത പ്രദേശങ്ങളിൽ ആശുപത്രിയിലേയ്‌ക്ക് രോഗിയെ കൊണ്ടു പോകാൻ മുളയിൽ തുണികെട്ടി ഉണ്ടാക്കിയ സ്ട്രച്ചറുകളാണ് ഉപയോഗിക്കുന്നത്. ഇതിന് പകരമായാണ് ആധുനിക സ്ട്രച്ചറുകൾ സുരേഷ് ഗോപി നൽകിയത്. മലക്കപാറയിൽ പൊതു ശൗചാലയം നിർമ്മിക്കാമെന്നും ജനങ്ങൾക്ക് സുരേഷ് ഗോപി ഉറപ്പ് നൽകിയിരുന്നു.
