ഡമാസ്‌കസ് : സിറിയയിലെ അലപ്പോയിൽ ദുരിതാശ്വാസ സാമഗ്രികൾ എത്തിച്ച് ഇന്ത്യൻ സൈന്യം. യുണൈറ്റഡ് നേഷൻസ് ഡിസെൻഗേജ്‌മെന്റ് ഒബ്‌സർവർ ഫോഴ്‌സിന്റെ ഭാഗമായ ഇന്ത്യൻ ആർമി ടീമാണ് സാധനങ്ങൾ എത്തിച്ചത്. നിരവധി ഭക്ഷ്യവസ്തുക്കളും മരുന്നുകളുമാണ് ഇന്ത്യയിൽ നിന്ന് സൈന്യം ഇവിടെയെത്തിച്ചത്.
ഓപ്പറേഷൻ ദോസ്ത് എന്ന ദൗത്യത്തിന് കീഴിൽ ആരോഗ്യ മന്ത്രാലയം രക്ഷാപ്രവർത്തനം നടത്തിയിരുന്നു. തുർക്കിയിലേക്കും സിറിയയിലേക്കും മാനുഷിക സഹായമെന്ന നിലയിലാണ് ഇന്ത്യ സഹായമെത്തിക്കുന്നത്. ഇതിനായി അടിയന്തര സാഹചര്യത്തിൽ ഉപയോഗിക്കുന്ന മരുന്നുകൾ, സംരക്ഷണ വസ്തുക്കൽ, മെഡിക്കൽ ഉപകരണങ്ങൾ എന്നിങ്ങനെ നിരവധി സാമഗ്രികൾ ഭൂകമ്പം ബാധിച്ച രാജ്യങ്ങളിൽ എത്തിച്ചിരുന്നു.
തുർക്കി-സിറിയ രാജ്യങ്ങളിൽ റിക്ടർ സ്‌കെയിലിൽ 7.5 തീവ്രതയിലാണ് ഭൂചലനമുണ്ടായത്.
ഭൂകമ്പത്തിൽ മരണപ്പെട്ടവരുടെ എണ്ണം 37,000 കടന്നിരുന്നു. പരിക്കേറ്റവരുടെ എണ്ണം ഒരു ലക്ഷത്തിലേക്ക് അടുക്കുകയാണ്. ഓപ്പറേഷൻ ദോസ്തിന്റെ ഭാഗമായി ഏഴ് സംഘമാണ് രാജ്യങ്ങളിൽ എത്തിയിട്ടുള്ളത്.
Comments