ജമ്മുകശ്മീർ : കശ്മീർ എഡിജിപി പുൽവാമ സന്ദർശിച്ച് പ്രദേശത്തെ ക്രമസമാധാന നില അവലോകനം ചെയ്തു. കശ്മീർ എഡിജിപി വിജയ് കുമാറാണ് പുൽവാമ സന്ദർശിച്ചത്.
അച്ചാൻ നിവാസിയായ കാശ്മീർ ഹിന്ദു സഞ്ചയ് ശർമ്മ തീവ്രവാദികളുടെ വെടിയേറ്റ് കൊല്ലപ്പെട്ടതിനെ തുടർന്നാണ് എഡിജിപിയുടെ സന്ദർശനം. വിശദമായ അവലോകന യോഗം നടത്തി. പോലീസും സുരക്ഷാസേനയും യോഗത്തിൽ പങ്കെടുത്തു. സുരക്ഷാ നടപടികളെ കുറിച്ച് കശ്മീർ ജനങ്ങളിൽ അവബോദം സൃഷ്ടിക്കും.
ഭീകര സംഭവങ്ങൾ തടയാൻ കൂടുതൽ സുരക്ഷാ നടപടികൾ സ്വീകരിക്കണമെന്ന് കശ്മീർ എഡിജിപി യോഗത്തിൽ നിർദേശിച്ചു. പുൽവാമ ജില്ലയിൽ തീവ്രവാദ വിരുദ്ധ പ്രവർത്തനങ്ങൾ വർദ്ധിപ്പിക്കണമെന്ന് യോഗത്തിൽ പങ്കെടുത്ത ഉദ്യോഗസ്ഥരോട് എഡിജിപി ആഹ്വാനം ചെയ്തു. ഹൈബ്രിഡ് ഭീകരരെ കണ്ടെത്തുന്നതിനും ഉചിതമായ നടപടികൾ സ്വീകരിക്കണമെന്ന് യോഗത്തിൽ ചർച്ച ചെയ്തു.
കഴിഞ്ഞ വർഷം കശ്മീരിൽ ഭീകരാക്രമണത്തിൽ നിരവധി കൊലപാതകങ്ങൾ നടന്നിരുന്നു. കൊല്ലപ്പെട്ടവരിൽ പലരും കശ്മീരിലെ കുടിയേറ്റ തൊഴിലാളികളായിരുന്നെന്ന് അധികൃതർ അറിയിച്ചു.
