ശ്രീനഗർ: പുൽവാമയിൽ ഭീകരരുമായുള്ള ഏറ്റുമുട്ടലിനിടെ സൈനികന് വീരമൃത്യു. ഇന്ന് പുലർച്ചെ പുൽവാമയിലെ അവന്തിപോര മേഖലയിൽ നടന്ന ഏറ്റുമുട്ടലിൽ ഒരു ഭീകരനെ സൈന്യം വധിച്ചിരുന്നു. രണ്ട് സൈനികർക്ക് പരിക്കേൽക്കുകയും ചെയ്തിരുന്നു. ഇതിൽ ഒരു സൈനികനാണ് ഇപ്പോൾ വീരമൃത്യു സംഭവിച്ചിരിക്കുന്നത്
സൈന്യവും, സിആർപിഫും,ജമ്മുകശ്മീർ പോലീസും സംയുക്തമായാണ് പ്രദേശത്ത് ഓപ്പറേഷൻ നടത്തിയത്. പ്രദേശത്ത് ഭീകരരുടെ സാന്നിദ്ധ്യമുള്ളതായി സുരക്ഷാ സേനയ്‌ക്ക് നേരത്തെ വിവരം ലഭിച്ചിരുന്നു. തുടർന്ന് നടത്തിയ തിരച്ചിലിനിടെ ഏറ്റുമുട്ടൽ ഉണ്ടാകുകയായിരുന്നു.
സുരക്ഷാ സേനയും പോലീസും പ്രദേശത്ത് സുരക്ഷ ശക്തമാക്കിയിട്ടുണ്ട്. സ്ഥലത്ത് ഏറ്റുമുട്ടൽ ഇപ്പോഴും തുടരുകയാണെന്നാണ് റിപ്പോർട്ട്.
