വർഷങ്ങളോളം കൂട്ടിൽ അടയ്‌ക്കപ്പെട്ട നിലയിൽ കഴിഞ്ഞിരുന്ന ഓർക്ക തിമിംഗലം കിസ്‌ക ഓർമയായി.വർഷങ്ങളായി തന്റെ വർഗത്തിൽപ്പെട്ട ഒരു ജീവിയെ പോലും കാണാതെ കഴിയുകയായിരുന്നു കിസ്‌ക. മറൈൻലാൻഡിലെ ഒന്റാറിയോ തീം പാർക്കിലാണ് ഇത്രയും കാലം കഴിഞ്ഞിരുന്നത്. 1979-ൽ ഐസ്ലൻഡിലെ സമുദ്രത്തിൽ നിന്നും പിടികൂടിയ തിമിംഗലമാണിത്.
കിസ്‌കയ്്ക്ക് 47 വയസ്സ് പ്രായം ഉണ്ടെന്നാണ് വിലയിരുത്തൽ. ബാക്ടീരിയ മൂലമുണ്ടായ അണുബാധയാണ് തിമിംഗലത്തിന്റെ ജീവൻ നഷ്ടപ്പെടാൻ കാരണമായതെന്ന് വെയിൽ സാങ്ച്വറി പ്രൊജക്്ട് അറിയിച്ചു. ലോകത്തിൽ ഏറ്റവും അധികം ഏകാന്തത അനുഭവിക്കുന്ന തിമിംഗലം എന്നാണ് കിസ്‌ക അറിയപ്പെട്ടിരുന്നത്. കിസ്‌ക അഞ്ച് കുഞ്ഞുങ്ങൾക്ക് ജന്മം നൽകിയിരുന്നെങ്കിലും അവയെല്ലാം ചെറുപ്പത്തിലെ ചത്തുപോയിരുന്നു.
കൂട്ടമായി കഴിയുന്നവയാണ് ഓർക്ക തിമിംഗലങ്ങൾ. നേരത്തെ കിസ്‌കയ്‌ക്ക് ഒപ്പം കെയ്‌ക്കോ എന്ന് പേരുള്ള മറ്റൊരു തിമിംഗലം കൂടി ഉണ്ടായിരുന്നു. 20 വർഷങ്ങൾക്ക് മുൻപാണ് ഇത് മരണപ്പെട്ടത്. മുൻപ് കിസ്‌ക്കയുടെ അവസ്ഥയെക്കുറിച്ച് വാർത്തകൾ പുറത്തുവന്നതോടെ അതിനെ മോചിപ്പിക്കണമെന്ന് ആവശ്യപ്പെട്ട് മൃഗസംരക്ഷണ സംഘടനകളും രംഗത്തെത്തിയിരുന്നു.
