അടുത്തിടെ മോഹൻലാലിനെതിരെ ശ്രീനിവാസൻ നടത്തിയ പ്രസ്താവനകൾ ഏറെ വിവാദമായിരുന്നു. അന്നത്തെ ശ്രീനിവാസന്റെ വാക്കുകൾ ആരാധകരെയും താരങ്ങളെയും ഏറെ നോവിച്ചിരുന്നു. ഇപ്പോഴിതാ വിഷയത്തിൽ പ്രതികരിച്ച് രംഗത്തെത്തിയിരിക്കുകയാണ് മകനും നടനുമായ ധ്യാൻ ശ്രീനിവാസൻ.
ഈ വിഷയത്തിൽ അഭിപ്രായം പറയാൻ തങ്ങളാരും ആളല്ല. എന്നാൽ അച്ഛനെ കുറിച്ച് അങ്ങനെയൊരു വാർത്ത കണ്ടപ്പോൾ ഏറെ വിഷമമായി. അച്ഛൻ കള്ളം പറയാറില്ല. എന്നാൽ ഇപ്പോൾ അങ്ങനെ പറയേണ്ട ആവശ്യമില്ലെന്ന് തോന്നിയെന്നായിരുന്നു ധ്യാനിന്റെ വാക്കുകൾ. മലയാള സിനിമയിലെ രണ്ട് വലിയ വ്യക്തികൾക്കിടയിൽ നടന്ന സംഭവമാണ് ഇത്. ഈ സംഭവങ്ങളൊക്കെ നടക്കുമ്പോൾ ഞാൻ നാട്ടില്ലെന്നുമായിരുന്നു താരത്തിന്റെ പ്രതികരണം.
‘അച്ഛനെ കുറിച്ച് ഇത്തരത്തിൽ ഒരു വാർത്ത കണ്ടപ്പോൾ വിഷമം തോന്നി. നമുക്ക് ഏറെ ഇഷ്ടപ്പെട്ട രണ്ട് പേരാണ്. അതിൽ ഒരാൾ മറ്റെയാളെ കുറിച്ച് ഇത്തരത്തിൽ പ്രസ്താവന നടത്തുമ്പോൾ അത് കേൾക്കുന്ന നമുക്കാണ് വിഷമം തോന്നുന്നത്. എന്തിനാണ് അങ്ങനെ പറയുന്നതെന്ന് വരെ ചിന്തിച്ചുപോകും. അത് സത്യമോ കള്ളമോ ആയിക്കോട്ടെ. അച്ഛൻ കള്ളം പറയാറില്ല. വർഷങ്ങൾക്ക് മുൻപ് ലാൽ സാർ അച്ഛനോട് പറഞ്ഞൊരു കാര്യം ഇപ്പോൾ വലിച്ചിടണ്ടേ ആവശ്യമില്ലായിരുന്നു’- ധ്യാൻ ശ്രീനിവാസൻ.
