മലയാള സിനിമയില്‍ ചില നടീ-നടന്മാര്‍ പ്രശ്‌നങ്ങള്‍ ഉണ്ടാക്കുന്നുണ്ടെന്ന് ഫെഫ്ക ജനറല്‍ സെക്രട്ടറിയും സംവിധായകനുമായ ബി. ഉണ്ണികൃഷ്ണന്‍ വെളിപ്പെടുത്തിയിരുന്നു. കഴിഞ്ഞ ദിവസം വാർത്താസമ്മേളനത്തിലെ വെളിപ്പെടുത്തിൽ സിനിമാ ലോകത്തെ ഏറെ ഞെട്ടിക്കുകയും ചെയ്തു. ഇപ്പോഴിതാ സിനിമാ മേഖലയിലെ പ്രശ്‌‌നക്കാരെക്കുറിച്ച് വെളിപ്പെടുത്തുകയാണ് പ്രൊഡക്ഷൻ കൺട്രോളറും സിനിമാ നിർമാതാവും ഫെഫ്ക പ്രൊഡക്ഷൻ എക്‌സിക്യൂട്ടീവ് യൂണിയൻ ജനറൽ സെക്രട്ടറിയുമായ ഷിബു ജി സുശീലൻ. ഒരു അഭിമുഖത്തിലാണ് ഷിബു ഇക്കാര്യങ്ങൾ വ്യക്തമാക്കിയത്.
ഷിബു ജി സുശീലന്റെ വാക്കുകൾ ഇങ്ങനെ
”പുതിയ ആൾക്കാർ സിനിമയിൽ എത്തിക്കഴിഞ്ഞ് ഒരു സിനിമ ഹിറ്റ് ആയിക്കഴിഞ്ഞാൽ അവരുടെ സ്വഭാവം മാറുകയാണ്. ഇത്തരത്തിലുള്ള അഭിനേതാക്കളെ കൊണ്ടുള്ള പ്രശ്നങ്ങൾ ഏറ്റവും കൂടുതൽ അനുഭവിക്കുന്നത് പ്രൊഡക്ഷൻ എക്‌സിക്യൂട്ടീവാണ്. കമ്മിറ്റ് ചെയ്തു കഴിഞ്ഞാൽ വിളിച്ചാൽ ഫോൺ എടുക്കില്ല, സമയത്ത് ഷൂട്ടിംഗിന് വരില്ല. ഇവർക്ക് പോയി കാശുകൊടുത്തിട്ട് ഇത്തരത്തിലാണ് ഇവർ പെരുമാറുന്നത്. മാന്യമായ പെരുമാറ്റം ഉണ്ടാവുന്നില്ല. അതേസമയം മോഹൻലാലും മമ്മൂട്ടിയുമൊക്കെ നിൽക്കുമ്പോഴാണ് പുതിയതായി വന്നവർ ഇങ്ങനെ പെരുമാറുന്നത്. പൃഥി രാജൊക്കെ വലിയ കൂളായി പ്രവർത്തിക്കുന്നവരാണ്. കോടികൾ ഇത്ര ചെറുപ്പത്തിലേ കൈയിൽ ലഭിക്കുന്നതിന്റെ തലക്കനമാകാം ഇവർക്ക്. നിർമാതാക്കളും സംവിധായകരും എഴുത്തുകാരുമൊന്നും ഇവരുടെ പക്കലേയ്‌ക്ക് പോകരുത്. നമ്മൾ എന്തിനാണ് ഇവരെ വിളിച്ചുകൊണ്ടുവന്നിട്ട് തലവേദന ഏൽക്കുന്നത്. ഇവർക്ക് കോടികളുടെ മാർക്കറ്റ് ഒന്നുമില്ല. പിന്നെ എന്തിനാണ് കടിക്കുന്ന പട്ടിയെ വാങ്ങുന്നത്. അവർ വിശ്രമിക്കട്ടെ, ഉറങ്ങട്ടെ. അവർ ഇങ്ങോട്ട് വരണമെങ്കിൽ അവരെ അങ്ങോട്ട് സമീപിക്കാതിരിക്കണം. ” ഷിബു പറയുന്നു.
” ഷൈൻ നിഗത്തിന് ‘അമ്മയിൽ’ മെമ്പർഷിപ്പ് എടുത്തുകൊടുത്തതിൽ കുറ്റബോധമുണ്ട്. അംഗത്വമെടുത്ത് കുറേ നാൾക്ക് ശേഷമാണ് പ്രശ്നങ്ങൾ തുടങ്ങുന്നത്. ഇത് എനിക്ക് പറ്റിയ അബദ്ധമാണതെന്ന് ഇടവേള ബാബുവിനോട് പറഞ്ഞിട്ടുണ്ട്. എഡിറ്റിംഗ് കാണണമെന്ന് ആവശ്യപ്പെടുന്നത് ഷൈൻ നിഗമാണ്. നടന്റെ കുടുംബമടക്കം എഡിറ്റിംഗിൽ ഇടപെടാറുണ്ട്. ശ്രീനാഥ് ഭാസിയും സിനിമയിൽ പ്രശ്നമുണ്ടാക്കുന്നയാളാണ്. ഹോം സിനിമയിൽ അഭിനയിക്കുന്ന സമയം, ശ്രീനാഥ് സെറ്റിലെത്തുന്നത് വളരെ താമസിച്ചാണ്. ഇത് ശരിയല്ലെന്ന് പറഞ്ഞ് ഞാൻ ശ്രീനാഥിന് മെസേജ് അയച്ചു. ഇതിന് പിന്നാലെ ഷിബു ചേട്ടൻ തന്നെ പിഡീപ്പിക്കുന്നുവെന്ന് പറഞ്ഞ് ശ്രീനാഥ് ഹോമിന്റെ നിർമാതാവ് വിജയ് ബാബുവിന് മെസേജ് അയച്ചു. നടൻ ഇന്ദ്രൻസ് ചോദിച്ചു എന്തിനാണ് ഇത്ര രാവിലെ തന്നെ സെറ്റിൽ കൊണ്ടിരിത്തുന്നതെന്ന്. സിനിമയുടെ പ്രൊമൊഷനും ശ്രീനാഥ് വന്നില്ല. ഇത്തരത്തിൽ പ്രവർത്തിക്കുന്നവരെവച്ച് എങ്ങനെ സിനിമ ചെയ്യും. ഇനിയാർക്കും അമ്മയിൽ മെമ്പർഷിപ്പ് എടുത്തുകൊടുക്കില്ല. പുതിയ ആൾക്കാർ സിനിമയിൽ എത്തിക്കഴിഞ്ഞ് ഒരു സിനിമ ഹിറ്റ് ആയിക്കഴിഞ്ഞാൽ അവരുടെ സ്വഭാവം മാറുകയാണ്. ഇനി ഇത്തരക്കാരെ സമീപിക്കരുത്. അവർ വിശ്രമിക്കട്ടെ.” ഷിബു കൂട്ടിചേർത്തു.
