ലക്നൗ : മുനിസിപ്പൽ തിരഞ്ഞെടുപ്പിന് മുന്നോടിയായുള്ള ഏകദിന പര്യടനത്തിനിടെ കാശിയിലെത്തി കാശി വിശ്വനാഥ് ധാമിൽ പ്രാർത്ഥന നടത്തി ഉത്തർപ്രദേശ് മുഖ്യമന്ത്രി യോഗി ആദിത്യനാഥ്. മുഖ്യമന്ത്രി യോഗി കാലഭൈരവ ക്ഷേത്രവും കാശി വിശ്വനാഥ് ധാമും സന്ദർശിച്ചു. ക്ഷേത്ര ഭരണസമിതി അംഗവസ്ത്രം നൽകിയാണ് യോഗിയെ സ്വീകരിച്ചത്. തദ്ദേശ തിരഞ്ഞെടുപ്പിൽ പാർട്ടിയുടെ വിജയത്തിനായി ഷോഡഷോപചാർ രീതിയിലൂടെ മുഖ്യമന്ത്രി യോഗി ബാബ വിശ്വനാഥിനെ പ്രാർത്ഥിച്ചു.
ഇതിന് പിന്നാലെ രോഹാനിയയിൽ സ്ഥിതി ചെയ്യുന്ന ബിജെപിയുടെ പ്രാദേശിക ഓഫീസിലും മുഖ്യമന്ത്രി യോഗി എത്തി. തുടർന്ന് പണ്ഡിറ്റ് ദീൻദയാൽ ഉപാധ്യായയുടെ പ്രതിമയിൽ പുഷ്പാർച്ചന നടത്തി. 100 വാർഡുകളിലേക്കുള്ള ബിജെപി കൗൺസിലർ സ്ഥാനാർഥികളുമായും മേയർ സ്ഥാനാർഥി അശോക് തിവാരിയുമായും അദ്ദേഹം പാർട്ടി ഓഫീസിൽ ചർച്ച നടത്തി. ജനങ്ങളിലേക്കെത്താൻ എല്ലാ സ്ഥാനാർത്ഥികളോടും വീടുവീടാന്തരം പ്രചാരണം നടത്താൻ അദ്ദേഹം ആവശ്യപ്പെട്ടു. വാരാണസി ഉൾപ്പെടെ രാജ്യത്തും സംസ്ഥാനത്തും നടക്കുന്ന വികസന പ്രവർത്തനങ്ങളെക്കുറിച്ച് എല്ലാ സ്ഥാനാർത്ഥികളും ജനങ്ങളിലേക്ക് എത്തിക്കണമെന്നും മുഖ്യമന്ത്രി
പറഞ്ഞു.
രണ്ടാം സർക്കാരിന്റെ ഫലപ്രാപ്തി ജനങ്ങളോട് വിശദീകരിക്കാനും മൂന്നാം സർക്കാർ അധികാരത്തിലെത്തിയാലുള്ള നേട്ടങ്ങളെ കുറിച്ച് അവരെ അറിയിക്കാനും മുഖ്യമന്ത്രി സ്ഥാനാർത്ഥികളോട് പറഞ്ഞു. ബിജെപി ജില്ലാ പ്രസിഡന്റ് ഹൻസ്രാജ് വിശ്വകർമ അടക്കം നിരവധി പാർട്ടി നേതാക്കൾ ചടങ്ങിൽ പങ്കെടുത്തു. ഉത്തർപ്രദേശിൽ നടക്കുന്ന മുനിസിപ്പൽ തിരഞ്ഞെടുപ്പിന്റെ ആദ്യഘട്ടമായ മെയ് നാലിന് വാരാണസിയിൽ വോട്ടെടുപ്പ് നടക്കും.
Comments