ബെംഗളൂരു: നുണകളുടെ ബലൂണുകൾ ഊതിവീർപ്പിക്കുകയാണ് കോൺഗ്രസെന്ന് പ്രധാനമന്ത്രി നരേന്ദ്രമോദി. കോൺഗ്രസ് എന്തുതന്നെ ചെയ്താലും തിരഞ്ഞെടുപ്പിൽ ബിജെപി വിജയം കൈവരിക്കുമെന്നും പ്രധാനമന്ത്രി പറഞ്ഞു. ബെംഗളൂരുവിലെ ശിവമോഗയിലെ പൊതു റാലിയെ അഭിസംബോധന ചെയ്യുകയായിരുന്നു അദ്ദേഹം.
‘തിരഞ്ഞെടുപ്പിനെ കോൺഗ്രസ് ഭയപ്പെടുകയാണ്. കോൺഗ്രസ് പാർട്ടിയുടെ രാഷ്ട്രീയവും വികസനവും കടലാസിൽ മാത്രമാണ് നിലകൊള്ളുന്നത്. അവർക്ക് കർണാടകയെ ഒരിക്കലും വികസിപ്പിക്കാൻ കഴിയില്ല. അവർ പ്രചാരണത്തിന് വേണ്ടി നിരന്തരം ആളുകളെ കൂട്ടുകയും നുണകൾ പ്രചരിപ്പിക്കുകയും ചെയ്യുന്നു. പക്ഷേ സത്യം ജനങ്ങൾക്ക് അറിയാം. അതിനാൽ നുണകൊണ്ട് എത്ര വലിയ ബലൂണുകൾ ഊതിവീർപ്പിച്ചാലും ഒരു പ്രയോജനവും ഉണ്ടാകില്ല. ഇന്ന് നീറ്റ് പരീക്ഷ ഉള്ളതിനാലാണ് റോഡ് ഷോ നേരത്തെ നടത്തിയത്. ഒരു രാഷ്ട്രീയ പാർട്ടിയും ഇത്ര നേരത്തെ റാലിയോ പൊതുയോഗമോ നടത്താൻ ധൈര്യപ്പെടുന്നില്ല. ബെംഗളൂരുവിലെ ജനങ്ങളിൽ നിന്ന് വലിയ സ്വീകരണവും സ്നേഹവും ലഭിച്ചുവെന്നും പ്രധാനമന്ത്രി പറഞ്ഞു.
‘കർണാടകയിലെ സ്ത്രീകളെ മുൻകാലങ്ങളിൽ കോൺഗ്രസ് സർക്കാർ പൂർണമായും അവഗണിച്ചു. അവർ കർഷകർക്കായി ഒരു വികസനവും നടത്തിയിട്ടില്ല. അഴിമതി മാത്രം ലക്ഷ്യമാക്കുന്ന ഒരു പാർട്ടിക്ക് കർണാടക സംസ്ഥാനം വികസിപ്പിക്കാൻ കഴിയുമോയെന്നും പ്രധാനമന്ത്രി ചോദിച്ചു. 85 ശതമാനം കമ്മീഷൻ വാങ്ങുന്ന പാർട്ടിക്ക് യുവാക്കളുടെ ഭാവിയെ കെട്ടിപ്പടുക്കാൻ കഴിയുമോ? കോൺഗ്രസ് ഒരിക്കലും യുവാക്കൾക്ക് വേണ്ടി പ്രവർത്തിച്ചിട്ടില്ല. കോൺഗ്രസ് ഭരണകാലത്ത് പെൺകുട്ടികളുടെ വിദ്യാഭ്യാസവും സ്ത്രീ ശാക്തീകരണവും ഉണ്ടായിരുന്നില്ല. സ്ത്രീകളോട് കാട്ടുന്ന അനീതി ഇല്ലാതാക്കാനാണ് ബിജെപി പ്രചാരണം നടത്തുന്നത്. ഇപ്പോൾ കോൺഗ്രസിന്റെ എല്ലാ നുണകളും പൂർണമായും തുറന്നുകാട്ടുകയാണ് ബിജെപിയെന്നും പ്രധാനമന്ത്രി പറഞ്ഞു.
